शिक्षक बँकेच्या अध्यक्षपदी सलीमखान पठाण

अहमदनगर : अहमदनगर जिल्हा प्राथमिक शिक्षक बँकेच्या नूतन पदाधिकाऱ्यांची निवड जिल्हा उपनिबंधक कार्यालयात करण्यात आली. बँकेच्या अध्यक्षपदी नगरपालिका विभागाचे संचालक सलीमखान पठाण यांची तर उपाध्यक्षपदी राहत्याचे संचालक बाबासाहेब खरात यांची बिनविरोध निवड करण्यात आली.

सहायक निबंधक एस. एल. रोकडे यांच्या अध्यक्षतेखाली झालेल्या सभेत सदरची निवड करण्यात आली. अध्यक्षपदासाठी पठाण यांचे नाव संचालक गंगाराम गोडे यांनी सुचवले तर अनुमोदन संचालक अनिल भवार यांनी दिले. उपाध्यक्षपदासाठी बाबासाहेब खरात यांचे नाव संचालक किसन खेमनर यांनी सुचवले तर अनुमोदन संचालक सुयोग पवार यांनी दिले. सहायक निवडणूक अधिकारी म्हणून उपनिबंधक कार्यालयाचे विक्रम मुटकुळे यांनी काम पाहिले. त्यांना शिक्षक बँकेचे मुख्य कार्यकारी अधिकारी दिलीप मुरदारे, संजय चौधरी यांनी सहकार्य केले. याप्रसंगी शिक्षक बँकेचे संचालक शरद सुद्रिक, संतोष दुसुंगे, अनिल भवार, साहेबराव अनाप, विद्युल्लता आढाव, उषाताई बनकर, अर्जुन शिरसाट, मावळते अध्यक्ष राजू राहाणे, किसन खेमनर, बाळासाहेब मुखेकर, गंगाराम गोडे, सुयोग पवार उपस्थित होते.

तत्पूर्वी सकाळी गुरुमाऊली मंडळाच्या झालेल्या कोअर कमिटीच्या बैठकीत अध्यक्षपदासाठी पठाण व उपाध्यक्षपदासाठी खरात यांची नावे अंतिम करण्यात आली. याप्रसंगी गुरुमाऊली मंडळाचे नेते बापूसाहेब तांबे, राज्य संघाचे उपाध्यक्ष दत्तापाटील कुलट, गुरुमाऊली मंडळाचे जिल्हाध्यक्ष राजकुमार साळवे, कार्याध्यक्ष बाळासाहेब सरोदे, रामेश्वर चोपडे, विठ्ठल फुंदे, बाळासाहेब तापकीर, नगरपालिका संघाचे जिल्हाध्यक्ष मच्छिंद्र लोखंडे, माजी अध्यक्ष गोकुळ कळमकर, राजेंद्र सदगीर, संदीप ठाणगे, दीपक बोराडे, सुरेश निवडुंगे, शिवाजी वाघ आदी उपस्थित होते.

निवडीनंतर बँकेच्या मुख्य शाखेमध्ये पदग्रहण सोहळा पार पडला. यावेळी संतोष वाघमोडे, श्याम पटारे, फारूक पटेल, दीपक शिंदे, सुनील गायकवाड, अमोल साळवे, राजू गायकवाड, सुनील घोगरे, रामकिसन भालेकर आदी उपस्थित होते.

................

४० वर्षांनंतर मुस्लीम समाजाचा अध्यक्ष

शिक्षक बँकेचा शंभरावा चेअरमन, बँकेच्या इतिहासात उर्दू माध्यमाचा पहिला चेअरमन तर चाळीस वर्षांनंतर मुस्लीम समाजाचा चेअरमन होण्याची संधी आमचे नेते बापूसाहेब तांबे यांनी दिली. त्याबद्दल त्यांना व गुरुमाऊली मंडळाच्या सर्व श्रेष्ठींना धन्यवाद देतो. विद्यमान संचालक मंडळाने सभासदाभिमुख उत्कृष्ट असा कारभार केला असून, यापुढेही ही परंपरा कायम राहील, असे नूतन अध्यक्ष सलीमखान पठाण यांनी सांगितले.