रासनेनगर परिसर कंटेनमेंट

अहमदनगर : सावेडी उपनगरातील रासनेनगर परिसर कंटेनमेंट झोन म्हणून जाहीर करण्यात आला असून, हा परिसर मंगळवारी पत्रे लावून बंद करण्यात आला आहे. शहरातील आणखी काही ठिकाणी कंटेनमेंट करण्यात येणार असल्याचे प्रशासनाकडून सांगण्यात आले.

शहरात कोरोना बाधित रुग्णांची संख्या वाढत आहे. मंगळवारी ६२६ नवे रुग्ण आढळून आले. सावेडी उपनगरातील रासनेनगर परिसरात एका दिवसात १३ रुग्ण आढळून आल्याने हा भाग कंटेनमेंट करण्यात आला आहे. केडगाव येथील शाहूनगर परिसर कंटेनमेंट करण्यात आला आहे. केडगाव कोरोनाचा हॉटस्पॉट बनल्याने या भागातील कंटेनमेंट झोनची संख्या आणखी वाढविण्यात येणार आहे. आरोग्य विभागाकडून सर्वाधिक रुग्ण आढळून आलेल्या १० ठिकाणांची यादी बांधकाम विभागाला दिल्याचे समजते. कंटेनमेंट जाहीर करण्याची जबाबदारी महापालिका आयुक्तांनी आरोग्य विभागावर साेपविली आहे. या विभागाकडून ज्या भागात कंटेनमेंट जाहीर केला जाईल, भागातील रस्ते काठ्या व पत्रे लावून बंद करण्याचे काम बांधकाम विभागाकडून केले जाणार आहे. बांधकाम विभागाचे अभियंत्यांकडून परिसराची पाहणी करून हा भाग बंद करण्याची कार्यवाही करण्यात येत आहे.

......

अत्यावश्यक सेवा पुरविण्यासाठी ३२ कर्मचाऱ्यांची नेमणूक

शहरातील कंटेनमेंट भागातील नागरिकांना सशुक्ल दूध, भाजीपाला, किराणा, औषधे आदी अत्यावश्यक सेवा पुरविण्यात येणार आहेत. त्यासाठी महापालिकेने प्रभाग कार्यालयनिहाय कर्मचाऱ्यांची नेमणूक केली आहे. हे कर्मचारी अत्यावश्यक सेवा पुरविण्याचे काम करणार आहेत.

...