विनामूल्य समाजसेवा करणारे राम-लखन

पिंपळगाव माळवी : गावातील विद्युत पुरवठा करणाऱ्या डीपीवरील फ्युज गेली, बोलवा साजिदला, मंदिरापुढील साफसफाई करायचीय बोलवा गाडे पाहुण्यांना. असाच नियमित अनुभव नगर तालुक्यातील पिंपळगाव माळवी येथील ग्रामस्थांचा आहे. त्याचे कारणही तसेच आहे. पिंपळगावातील साजिद पठाण व बापूसाहेब गाडे ही जोडगोळी गावातील कुठल्याही समाजसेवेच्या कामासाठी नेहमीच उभे राहते.

पिंपळगावातील असलेले विविध मंदिरे व त्याची साफसफाई याकामी बापूसाहेब गाडे नेहमीच अग्रेसर राहतात. गावातील अमरधाम येथे नुकतेच सुशोभीकरण करण्यात आले आहे. या ठिकाणी अंत्यविधी झाल्यानंतर बराचसा कचरा तसाच पडलेला असतो. बापूसाहेब गाडे नियमितपणे त्यांना वेळ मिळेल त्यावेळी अमरधाम येथे साफसफाई करतात. तसेच गावातील दुसरा युवक साजिद पठाण हादेखील गावातील विविध सामाजिक काम करण्यात अग्रेसर असतो. गावातील विविध प्रकारचे विद्युत डीपी (राेहित्र), पोलवरील दुरुस्ती, पिण्याच्या पाण्याच्या पाइपलाइनची दुरुस्ती, विविध धार्मिक कार्यक्रमात नियमित हातभार लावतो. हे दोघेही या आपल्या कामाचा कुठलाही मोबदला घेत नाही. त्या दोघांनाही समाजसेवेची आवड असल्यामुळे कुठल्याही सार्वजनिक कामामध्ये दत्त म्हणून हजर असतात. त्यांच्या या समाजसेवेचा कामांबद्दल या दोघांची ग्रामस्थांकडून कुठलीही अपेक्षा नसते.

....

मला लहानपणापासून समाजसेवेची आवड आहे. या कामातून मला मनस्वी आनंद मिळतो.

-साजिद पठाण,

युवक, पिंपळगाव माळवी

....

....

अमरधाम येथे अंत्यविधीनंतर बराचसा कचरा तसाच पडलेला असतो. नंतर येथे येणाऱ्यांना अडचण होऊ नये म्हणून मी तेथे नियमित साफसफाई करतो.

-बापूसाहेब गाडे,

युवक, पिंपळगाव माळवी

फोटो ओळ २६ पिंपळगाव माळवी

पिंपळगाव माळवी येथील हनुमान मंदिरासमोरील स्वच्छता करताना बापूसाहेब गाडे व साजिद पठाण.