गर्भगिरी डोंगराला लागलेल्या आगीचा पंचनामा

करंजी : पाथर्डी तालुक्यातील करंजीपासून जवळ असलेल्या गर्भगिरी डोंगरातील परशुराम दऱ्यात लागलेल्या आगीचा पंचनामा करून जबाब घेण्यात आले. घटनेचे गांभीर्य वेळीच लक्षात घेऊन वन विभागाचे कर्मचारी व स्थानिक नागरिकांनी तत्परता दाखविल्याने मोठा अनर्थ टळला. आगीचे कारण शोधण्याचाही वनविभागाकडून शोध सुरू आहे.

पाथर्डी तालुक्यातील खंडोबावाडीजवळ (करंजी) असलेल्या गर्भगिरी डोंगररांगातील परशुराम दऱ्यात लागलेल्या आगीत झाडांचे झालेले नुकसान तसेच प्राणास मुकलेल्या पक्षी व प्राण्यांची पहाणी करून पंचनामे करण्यात आले. गर्भगिरी डोंगरावरच्या बाजूस बीड जिल्ह्याची हद्द येते. या पठार भागात आष्टी तालुक्यातील काही गावातील शेतकऱ्यांच्या जमिनी आहेत.

आष्टी तालुक्यातील वनातून तसेच काही शेतकऱ्यांच्या जमिनीतून ही आग काही वेळातच पाथर्डी तालुक्याच्या हद्दीत पोहोचली. रात्रीची वेळ व सुटलेल्या वाऱ्यामुळे आग आटोक्यात आणण्यात अडचण येत होती. गर्भगिरी डोंगराला लागलेली आग परिसरातील २०-२५ किलोमीटर अंतरावरून दिसत असल्याने परिसरातील अनेक नागरिकांनी घटनेची माहिती वन विभागास दिल्याने वनविभागाचे कर्मचारी तसेच स्थानिक लोकांच्या सतर्कमुळे अनर्थ टळला. त्यामुळे या भागातील लाखो वृक्षही वाचले.

----

करंजीजवळील गर्भगिरी डोंगरास लागलेल्या आगीत ३ हेक्टर क्षेत्रात नुकसान झाले. या नुकसानीचे पंचनामे तसेच जबाब नोंदविण्यात आले असून अहवाल नगर कार्यालयास पाठविला आहे.

-दादासाहेब वाघुलकर,

वन परिक्षेत्र अधिकारी, तिसगाव

----

तिसगाव वनखात्याच्या अधिकाऱ्यांशी करंजीतील आगीच्या घटनेबाबत सविस्तर चर्चा केली आहे. संबंधितांवर प्रतिबंधित कारवाई करून त्यांच्यावर लवकरच गुन्हा दाखल करण्यात येईल.

-देवदत्त केकाण,

प्रांताधिकारी, पाथर्डी-शेवगाव