फलटण चौकीत जुगारींचा अड्डा

अहमदनगर : सतत बंद असलेल्या महामार्ग पोलिसांच्या फलटण पोलीस चौकीच्या मागे सुरू असलेल्या जुगार अड्ड्यावर तोफखाना पोलिसांनी शुक्रवारी छापा घातला. यासह अन्य तीन ठिकाणी पोलसांनी छापे घालून कारवाई केली़
कोठला चौकात महामार्ग पोलिसांसाठी फलटण पोलीस चौकी आहे. ही चौकी सतत बंद असते. या चौकीच्या मागेच मटका खेळणाऱ्यांचा नेहमीच हैदोस असतो. शुक्रवारी सायंकाळी तोफखाना पोलिसांनी या चौकीमागे सुरू असलेल्या अड्ड्यावर कारवाई केली. त्यामध्ये २ हजार २६० रुपये रोख आणि मटका खेळण्याचे साहित्य जप्त केले. पोलीस कर्मचारी सागर सुलाणे यांनी दिलेल्या फिर्यादीनुसार दत्तू मोतीराम भिंगारे याच्याविरुद्ध गुन्हा दाखल केला आहे.
पाईपलाईन रोडवरील प्रियदर्शिनी कॉलनीमध्ये छापा टाकून मटका साहित्य व ४ हजार ५४० रुपये जप्त केले. या प्रकरणी पोलीस नाईक दत्तात्रय हिंगडे यांच्या फिर्यादीवरून पाच जणांविरुद्ध गुन्हा दाखल केला.
नगर तालुका पोलिसांनी कौडगाव येथील श्रेयस हॉटेलमध्ये ९०२ रुपये किमतीची देशी दारू जप्त केली़ अमोल ठाले यांच्या फिर्यादीवरून गोरख तुकाराम चांदणे याच्याविरुद्ध गुन्हा दाखल करण्यात आला आहे.