श्रीगोंदा : श्रीगोंदा पंचायत समितीचे गटविकास अधिकारी प्रशांत काळे यांना शिवीगाळ व दमबाजी केल्या प्रकरणातील आरोपी श्रीगोंदा बाजार समितीचे माजी सभापती बाळासाहेब नाहाटा यांना जिल्हा सत्र न्यायालयाने दोन दिवसांची पोलीस कोठडी सुनावली. दरम्यान, राजकीय दबावाखाली काळे यांनी माझ्यावर खोटा गुन्हा दाखल केला, असा आरोप करीत नाहाटा यांनी पोलीस कोठडीतच उपोषण सुरू केले आहे.
बाळासाहेब नाहाटा यांना मंगळवारी न्यायालयात हजर केले. न्यायालयाने दोन्ही बाजूंचा युक्तिवाद ऐकून बाळासाहेब नाहाटांना दोन दिवसांची पोलीस कोठडी दिली. जिल्हा परिषदेचे मुख्य कार्यकारी अधिकारी राजेंद्र क्षीरसागर यांनी मंगळवारी सकाळी गटविकास अधिकारी प्रशांत काळे यांची भेट घेऊन काळे यांना दिलासा दिला, तसेच या प्रकरणाची पार्श्वभूमी समजून घेतली.
श्रीगोंदा पंचायत समिती, तहसील कार्यालय, नगरपालिका कार्यालयातील कर्मचाऱ्यांनी काळ्या फिती लावून कामकाज केले, तसेच गटविकास अधिकारी प्रशांत काळे यांना झालेल्या शिवीगाळ, दमबाजी प्रकरणाचा निषेध नोंदविला. नायब तहसीलदार डॉ. योगिता ढोले यांना निवेदन देण्यात आले.
...........
या प्रकरणाचा पर्दाफाश करणार
राष्ट्रवादी काँग्रेसच्या एका पुढाऱ्याच्या सांगण्यावरून प्रशांत काळे यांनी माझ्याविरोधात खोटा गुन्हा दाखल केला आहे. मी बाहेर आल्यानंतर या प्रकरणाचा पर्दाफाश करणार आहे, अशी माहिती बाळासाहेब नाहाटा यांना दिली.
आपण पालकमंत्री हसन मुश्रीफ यांच्या आढावा बैठकीत वादळी भूमिका मांडली, याचा बदला घेण्यासाठी आपल्याला यात गुंतवले आहे.
मी कोरोना काळात जनतेला केलेली मदत काही नेत्यांच्या डोळ्यात खुपत आहे.
त्यांना स्वत: काही करायचे नाही आणि दुसऱ्याला काही करू द्यायचे नाही. नीच राजकारण करून मला बदनाम करण्याचे षडयंत्र रचले आहे. आपण पोलीस कोठडीत अन्न, पाणी, औषध काहीच घेणार नाही, असेही नाहाटा म्हणाले.
..........
२२ श्रीगोंदा कर्मचारी