जगतापांसाठी पिचड मैदानात

अहमदनगर : विधान परिषद निवडणुकीच्या पार्श्वभूमीवर मंगळवारी दुपारी राष्ट्रवादीचे ज्येष्ठ नेते मधुकर पिचड यांनी दोन तास प्रमुख नेत्यांच्या उपस्थितीत जिल्हा परिषद सदस्यांचा आढावा घेतला. यावेळी कोणत्याही परिस्थितीत राष्ट्रवादीचे उमेदवार आमदार अरुण जगताप यांना विजयी करण्याचा आदेश पिचड यांनी दिला. जगताप यांच्या विजयासाठी थेट पिचड आता प्रचार मैदानात उतरले आहेत. राष्ट्रवादी भवनमध्ये मंगळवारी दुपारी पिचड आले होते. यावेळी उमेदवार अरुण जगताप, जिल्हा परिषदेचे विद्यमान सभापती शरद नवले, माजी अध्यक्ष विठ्ठलराव लंघे, सिध्दार्थ मुरकुटे, सुजीत झावरे, कैलास वाकचौरे, सुनील गडाख, सचिन जगताप यांच्यासह अन्य पदाधिकारी उपस्थित होते. यावेळी पिचड यांनी उपस्थितीत सदस्यांकडून तालुकानिहाय आढावा घेतला. जिल्हा परिषदेत राष्ट्रवादीचे सदस्यबळ ३२ असून ४ ठिकाणी सभापतीपद ताब्यात आहे. राष्ट्रवादीच्या ३६ संख्याबळातून काही सदस्य विधानसभा निवडणुकीत बाजूला गेलेले आहे. हे सदस्य सोडून उर्वरित सर्व सदस्यांनी एकत्र रहावे. जिल्हा परिषदेतील राष्ट्रवादीतील मते कोणत्याही परिस्थितीत फुटणार नाहीत. सदस्यांनी आणि पदाधिकाऱ्यांनी सावध राहवे, असा सल्ला पिचड यांनी दिली. साधारण दोन तास चाललेल्या बैठकीत कोणत्याही परिस्थितीत जगताप यांना निवडून आणण्याचे आदेश त्यांनी दिले. (प्रतिनिधी) दरम्यान, निवडणुकीतील काँग्रेसचे बंडखोर उमेदवार जयंत ससाणे यांच्या उमेदवारीवरुन राष्ट्रवादीच्या सदस्यांमध्ये गोंधळ आहे.‘लोकमत’शी बोलताना अनेक सदस्यांनी ससाणे माघारी फिरतात की बंडखोरी करतात, यावर निवडणुकीचा निकाल अवलंबून राहणार आहे. पक्षाकडून सदस्यांना अद्याप कोणत्याच सूचना प्राप्त झाल्या नसल्याचे सांगण्यात आले. शशिकांत गाडेंचा मतदारांशी संवाद विधान परिषदेचे शिवसेना-भाजपाचे उमेदवार शशिकांत गाडे मंगळवारी उत्तर जिल्ह्याच्या दौऱ्यावर होते. यावेळी संपर्कप्रमुख भाऊ कोरगावकर, प्राजक्त तनपुरे, भाजपाचे माजी आ. चंद्रशेखर कदम त्यांच्या सोबत होते. गाडे यांनी लग्न समारंभाचे निमित्त साधत उत्तरेतील मतदारांशी संवाद साधला. यावेळी पक्षातील पदाधिकारी यांच्या मदतीसाठी सरसावले होते.