श्रीरामपुरातील फरार व्यापाऱ्यांचा शोध घ्या

मनोज पाटील : पीडित शेतकऱ्यांनी मांडली कैफियत

लोकमत न्यूज नेटवर्क

श्रीरामपूर : येथील शेतकऱ्यांचे एक कोटी रुपयांचे भुसाराचे पैसे बुडवून पळ काढणाऱ्या चार व्यापाऱ्यांचा तातडीने शोध घेण्याचे आदेश जिल्हा पोलीस प्रमुख मनोज पाटील यांनी दिले. याप्रकरणी पोलीस तपासात दिरंगाई केल्यास कारवाई करण्याचा इशाराही त्यांनी श्रीरामपूर पोलिसांना दिला आहे.

व्यापारी हिरण यांच्या हत्येच्या तपासाची माहिती देण्यासाठी शनिवारी पाटील यांनी येथे पत्रकार परिषद घेतली. त्यावेळी तालुक्यातील माळवाडगावसह परिसरातील शेतकऱ्यांनी पाटील यांची भेट घेतली.

याप्रकरणी रमेश रामलाल मुथा, चंदन रमेश मुथा, गणेश रामलाल मुथा या व्यापाऱ्यांविरोधात तालुका पोलीस ठाण्यात फसवणुकीचा गुन्हा दाखल करण्यात आला आहे. व्यापाऱ्याने शेतकऱ्यांची एक कोटी १४ लाख रुपयांची फसवणूक केली आहे. मात्र, ८ फेब्रुवारीपासून हे आरोपी कुटुंबासह फरार झाले आहेत. पोलिसांना अद्याप त्यांचा शोध घेण्यात यश आलेले नाही, अशी कैफियत शेतकऱ्यांनी मनोज पाटील यांच्यासमोर मांडली.

या प्रकरणाची पाटील यांनी गंभीर दखल घेतली आहे. त्यांनी तातडीने शोध कार्य हाती घेण्याचे आदेश यावेळी अतिरिक्त पोलीस अधीक्षक डॉ. दीपाली काळे, पोलीस उपाधीक्षक संदीप मिटके यांना दिले. याप्रकरणी कारवाईस टाळाटाळ झाली तर खपवून घेतले जाणार नाही, असा इशाराही त्यांनी दिला.

व्यापारी मुथा बंधू यांनी एका मोठ्या पतसंस्थेकडून कर्ज उचलले होते. त्यांचे ८ हजार भुसाराचे पोते पतसंस्थेकडे तारण आहेत. मुथा यांचे माळवाडगाव येथे मोठे किराणा दुकान होते. भुसाराचे मोठे गोदामही त्यांनी बांधले होते. ते सर्व सोडून व्यापाऱ्यांनी धूम ठोकली आहे.

...

पावत्यावरुन गुन्हा दाखल

पोलिसांनी जळगाव, पालघर, मुंबई, नवसारी, बडोदा येथे व्यापारी मुथा यांचा शोध घेतला. मात्र, ते सापडले नाहीत. त्यामुळे शेतकरी हवालदिल झाले आहेत. मुथा यांनी शेतकऱ्यांना दिलेले धनादेश तसेच भुसाराच्या पावत्यांवरून गुन्हा दाखल करण्यात आला आहे. अनेक शेतकरी पुराव्याअभावी गुन्हा दाखल करण्यासाठी अद्याप पुढे आलेले नाहीत. तालुका पोलीस ठाण्याचे निरीक्षक मसूद खान याप्रकरणी तपास करीत आहेत.