संशोधनासाठी संस्थेकडून आडसूळ महाविद्यालयात सर्वतोपरी सहकार्य

चास येथील सुंदराबाई माणिक आडसूळ तंत्रनिकेतन महाविद्यालयात नुकतेच कोविड संसर्गाच्या पार्श्वभूमीवर राज्यस्तरीय ऑनलाइन टेक्निकल क्विझ कॉम्पिटिशनचे आयोजन करण्यात आले होते. ही स्पर्धा तंत्रनिकेतन अंतिम वर्षात शिकणाऱ्या विद्यार्थ्यांसाठी आयोजित करण्यात आली होती. त्यामध्ये महाराष्ट्रातील वेगवेगळ्या महाविद्यालयातील सर्व विभागांतील विद्यार्थ्यांनी सहभाग नोंदवला व उत्कृष्ट गुण प्राप्त केले. त्यांचे अभिनंदन करण्यासाठी २७ मे २०२१ रोजी त्यांचा गुणगौरव सोहळा ऑनलाइन आयोजित करण्यात आला.

कार्यक्रमासाठी प्रमुख पाहुणे म्हणून संस्थेचे संस्थापक प्रा. अनिरुद्ध आडसूळ आणि उपसंस्थापक प्रा विश्वनाथ आडसूळ तसेच शासकीय तंत्रनिकेतनचे डॉ. सुरेश सारडा, प्रा. सुधीर मुळे, डॉ. बाबासाहेब खरबस, प्रा. सुरेश कांबळे आणि कॉलेजचे प्राचार्य आर. एस. गडाख उपस्थित होते.

प्रथम क्रमांकाचे पारितोषिक शासकीय तंत्रनिकेतन अहमदनगर येथील अनुराग वराळे याने, द्वितीय पारितोषिक विभागून शासकीय तंत्रनिकेतनमधील श्रद्धा शिंदे आणि संजीवनी तंत्रनिकेतनमधील गायकवाड ओम यांना आणि तृतीय क्रमांकाचे पारितोषिक आडसूळ तंत्रनिकेतनमधील शिरसाठ गणेश याने मिळवले.

प्रा. अनिरुद्ध आडसूळ मार्गदर्शन करताना म्हणाले की, यापुढे संस्थेतील जो कोणी विद्यार्थी संशोधन करेल त्यासाठी लागणारे संपूर्ण आर्थिक साहाय्य संस्था करेल.