जिल्हा बँकेबाबत बुधवारी मुंबईत बैठक

अहमदनगर : राष्ट्रवादी काँग्रेसचे अध्यक्ष खासदार शरद पवार यांनी रविवारच्या नगर दौऱ्यात जिल्हा बँकेच्या निवडणुकीबाबत माहिती घेतली. आमदार संग्राम जगताप यांच्या निवासस्थानी त्यांनी जिल्ह्यातील राष्ट्रवादीच्या नेत्यांशी चर्चा केली. बँक निवडणुकीबाबत २७ जानेवारीला मुंबईत बैठक घेऊ. जिल्ह्यातील प्रमुख नेत्यांनी या बैठकीला यावे. तिथे उपमुख्यमंत्री अजित पवार हे उपस्थित असतील, असे शरद पवार यांनी स्पष्ट केले.

जिल्हा सहकारी बँकेची निवडणूक प्रक्रिया सध्या सुरू आहे. मंगळवारी (दि. २५) अर्ज दाखल करण्याचा शेवटचा दिवस आहे. महसूलमंत्री बाळासाहेब थोरात यांनी शनिवारी महाविकास आघाडीतील नेत्यांसोबत संगमनेरला बैठका घेतल्या. या बैठकांना भाजपचे काही नेते उपस्थित होते. या पार्श्वभूमीवर पवार रविवारी नगर दौऱ्यावर असताना त्यांनी जगताप यांच्या निवासस्थानी सर्व माहिती घेतली. यावेळी पालकमंत्री हसन मुश्रीफ, राज्यमंत्री प्राजक्त तनपुरे, आमदार नीलेश लंके, आमदार लहू कानडे, आमदार आशुतोष काळे, जिल्हाध्यक्ष राजेंद्र फाळके, माजी आमदार नरेंद्र घुले, चंद्रशेखर घुले, राहुल जगताप, माजी आमदार पांडुरंग अभंग, उदय शेळके, घनश्याम शेलार, नगरध्यक्षा अनुराधा आदिक, आदी उपस्थित होते.

खा. पवार यांनी उपस्थित नेत्यांबरोबर जिल्हा बँकेच्या निवडणुकीबाबत चर्चा करून परिस्थितीची माहिती घेतली. महाआघाडीच्या सर्व नेत्यांनी एकत्र राहून ही निवडणूक लढवावी, अशी सूचना पवार यांनी केली. निवडणुकीच्या नियोजनासाठी २७ जानेवारीला मुंबईत बैठक घेऊ. उपमुख्यमंत्री अजित पवार, काँग्रेसचे प्रदेशाध्यक्ष, महसूलमंत्री बाळासाहेब थोरात, पालकमंत्री हसन मुश्रीफ यांच्या उपस्थितीत ही बैठक होईल. या बैठकीला जिल्ह्यातील सर्व प्रमुख नेत्यांनी मुंबईत यावे, असेही आवाहन पवार यांनी केले. प्रारंभी आमदार जगताप यांनी पवार यांचे स्वागत केले. यावेळी पार्वती जगताप, जि. प. सदस्य सुवर्णा जगताप, नगरसेविका शीतल जगताप, विलास जगताप, डॉ. शशिकांत फटके, डॉ. वंदना फाटके, वैभव जगताप, विकी जगताप उपस्थित होते.

--------

फोटो- २४ शरद पवार-जगताप मीट

राष्ट्रवादी काँग्रेसचे अध्यक्ष खासदार शरद पवार यांनी आमदार संग्राम जगताप यांच्या निवासस्थानी रविवारी दुपारी चर्चा केली. त्यांच्यासमवेत मंत्री हसन मुश्रीफ, आमदार अरुण जगताप, चंद्रशेखर व नरेंद्र घुले, राहुल जगताप, पांडुरंग अभंग.