अपंग पल्लवीला अधिकारी व्हायचंय...

पारनेर: लहानपणापासूनच पाठीतून अपंग. पण, शिकायची जिद्द खूप. पण शाळेत सोडणार कोण? आई मंगल यांनी घेतली जबाबदारी आणि जिद्दीने पेललीही. मायेच्या जिद्दीला पल्लवीने ही सार्थ ठरविली. दहावीच्या परीक्षेत ९४.८० टकके गुण मिळवून पारनेर न्यू इंग्लिश स्कूलमधील प्रथम क्रमांक पटकाविताना यशाला गवसणी घातली.
पल्लवीचे वडील राजेंद्र चाकण एम.आय. डि.सी. त कंपनीत काम करतात. तर आई मंगल गृहणिी. पारनेर-जामगाव रस्त्यावर हवालदार वस्तीवर त्यांचे घर आहे. पहिलीपासुन हुशार असणाऱ्या पल्लवीला चौथीपर्यंत घराजवळच शाळेचा प्रश्न आला नाही . पल्लवीला पाठीच्या बाजूने अपंगत्व व उंची सुध्दा लहान. चालण्याचे काम तर यामुळे अवघडच. अशा परिस्थितीत पाचवीला न्यू इंग्लीश स्कूलला जायचे म्हणजे तीन किलोमीटरचे अंतर होते. पल्लवीची जिद्द शिकण्याची होती. वडील नोकरीनिमित्त बाहेर म्हणल्यावर आई मंगल यांनीच तिच्या शिक्षणाचा विडा उचलला. ऊन, वारा, पाऊस याची तमा न बाळगता दररोज शाळेत पल्लवीला शाळेत घेऊन येणे-जाणे असा त्यांनी नित्यक्रम सुरू ठेवला. यंदाच्या वर्षी पल्लवीचे दहावीचे वर्ष म्हणल्यावर त्यांची तारेवरची कसरत झाली. सकाळी जादा तास,पुन्हा घरी व नंतर पुन्हा शाळेला अशी पल्लवीला ने-आण त्यांना करावी लागली. आईची जिद्द पल्लवीच्या मनाला भावली. तिनेही मग आपण पाठीने व उंचीने अपंग आहोत पण बुध्दीने अपंग नाही, हे दाखवून दिले.
पाठांतरावर तिचे प्राबल्य आहे हे पल्लवीच्या बोलण्यातून जाणवत होते. पाठांतर केले की ते आठवून लिहून काढणे ही तिची अभ्यासची पध्दत तिला दहावीच्या परीक्षेत यशाच्या शिखरावर पोहोचवणारी ठरली.
शाळेतला प्रत्येक अभ्यास पूर्ण करणे ही तिची वेगळी शैली असल्याचे प्राचार्या उषा रोहोकले यांनी सांगितले. मंगळवारी दहावीचा निकाल पाहिल्यावर ‘लोकमत’ शी बोलताना दोघी मायलेकींच्या चेहऱ्यावर आनंद ओसंडून वहात होता. शिवाय यावेळी आपण अपंग आहोत असे वाटणारा कोणताही भाव तिच्या मनावर नव्हता.
(प्रतिनिधी)
अधिकारी बनायचंय..
दहावीत यश मिळाल्यावर आता अधिकारी बनण्याचे स्वप्न पल्लवीने उराशी बाळगलेय. आता तर तिची आई मंगल या तिच्यासाठी काहीही करायला तयार आहे.आपल्या लेकीने आम्हाला जिद्द शिकविली. तिला साथ देणारच असे त्या दोघी आत्मविश्वासने सांगत होत्या.