कोविड रुग्णांकडून ८५ लाखांची जास्तीची रक्कम वसूल

लोकमत न्यूज नेटवर्क

अहमदनगर : शहरातील रुग्णालयांनी कोविड रुग्णांकडून ८५ लाख रुपये जास्तीचे आकारल्याचे उघड झाले आहे. महाराष्ट्र नवनिर्माण सेनेने बुधवारी केलेल्या आंदोलनानंतर महापालिका प्रशासनाकडून ही माहिती देण्यात आली. दरम्यान, रुग्णालयांवर कायदेशीर कारवाई करण्याच्या आयुक्तांच्या आश्वासनानंतर आंदोलन स्थगित करण्यात आले.

कोविड रुग्णांना जास्तीची रक्कम परत करण्याच्या मागणीसाठी मनसचे जिल्हाध्यक्ष सचिन डफळ यांच्या नेतृत्वाखाली पदाधिकारी बुधवारी दुपारी महापालिकेत आले. आयुक्त हे दालनात उपस्थित नव्हते. ते शेजारीच असलेल्या सभागृहात होते. मनसेचे पदाधिकारी सभागृहात येऊन धडकले. फरशीवर पोते टाकून काही पदाधिकारी त्यावर झोपले. यावेळी सचिन डफळ, अनिता दिघे, नितीन भुतारे यांच्यासह पदाधिकाऱ्यांनी रुग्णालयांवर कारवाई करण्याचे लेखी द्या, त्यानंतरच आम्ही उठू, असा इशारा दिला. त्यावर रुग्णालयांवर कायदेशीर कारवाईची प्रक्रिया सुरू करण्यात आली आहे. मुंबई नर्सिंग होम कायद्यानुसार रुग्णालयांना नोटिसा बजावण्यात येणार आहेत, असे आयुक्त श्रीकांत मायकलवार यांनी सांगितले. मात्र, आंदोलनकर्त्यांचे समाधान झाले नाही. त्यांनी ज्या रुग्णालयांनी जास्तीची रक्कम परत केली नाही, अशा रुग्णालयांची नावे जाहीर करण्याची मागणी केली. आंदोलनकर्त्यांची मागणी मान्य करीत आयुक्तांनी वैद्यकीय आराेग्य अधिकारी डॉ. अनिल बोरगे यांना रुग्णालयांची यादी आंदोलनकर्त्यांना देण्याचा आदेश दिला. त्यानंतर आंदोलन स्थगित करण्यात आले.

...

कोविड रुग्णांना जोपर्यंत पैसे परत मिळत नाहीत, तोपर्यंत मनसेच्या वतीने पाठपुरावा करण्यात येईल. रुग्णालयांनी गोरगरीब रुग्णांना त्यांचे पैसे परत करावेत; अन्यथा पुन्हा आंदोलन करण्यात येईल.

-नितीन भुतारे, मनसे

..

सूचना फोटो आहे.