भवरवाडीत आढळले १८ कोरोनाबाधित

खरवंडी कासार : पाथर्डी तालुक्यातील मिडसांगवी ग्रामपंचायत अंतर्गत भवरवाडीत कोरोनाचा प्रादुर्भाव वाढला आहे. आठ दिवसांत १८ जण कोरोनाबाधित आढळून आले.

मध्यंतरी खरवंडी कासार प्राथमिक आरोग्य केंद्रांतर्गत परिसरामध्ये कोरोनाची रुग्णसंख्या कमी झाली होती. परंतु, पुन्हा अचानक कोराेनाग्रस्तांची रुग्णसंख्या वाढू लागली आहे. त्यानंतर आरोग्य अधिकारी डॉ. वॄषाली दराडे, डॉ. मोनिका आघाव यांनी भवरवाडी येथे येऊन पाहणी केली. प्रत्येक नागरिकाने कोरोना तपासणी करून घ्यावी, सॅनिटायझर, मास्क, फिजिकल डिस्टन्सिंगचा वापर करावा, असे आवाहन त्यांनी केले.

प्राथमिक आरोग्य केंद्रात दररोज कोरोना प्रतिबंधक लसीकरण सुरू आहे. नागरिकांनी त्याचाही लाभ घेण्याचे आवाहन त्यांनी केले.

खरवंडी कासार प्राथमिक आरोग्य केंद्र परिसरात असणाऱ्या सर्व गावातील ॲक्टिव्ह रुग्णांची संख्या ३९ असून, त्यापैकी १८ रुग्ण हे एकट्या भवरवाडी येथील आहेत.