हातगाडीवाल्याना खंडणीसाठी मारहाण, धमक्या व महिलेचा विनयभंग करणाऱ्या गुंडास अखेर बेड्या ठोकल्या

भाईंदर पूर्वेच्या न्यू गोल्डन नेस्ट भागात वर्धमान इमारती जवळ अमिनाबीबी शेख हि महिला अंडापावची गाडी लावते .

मीरारोड - भाईंदर पूर्वेच्या न्यू गोल्डन नेस्ट परिसरात हातगाडी वाल्यां कडून खंडणी उकळणाऱ्या व खंडणी न दिल्यास मारहाण , तोडफोड करून धमकावणाऱ्या , विक्रेत्या महिलेचा विनयभंग करणाऱ्या संदेलकुमार उर्फ पालनाथ नाडर ( ३८ )  ह्या गुंडास अखेर नवघर पोलिसांनी बेड्या ठोकल्या आहेत. 

भाईंदर पूर्वेच्या न्यू गोल्डन नेस्ट भागात वर्धमान इमारती जवळ अमिनाबीबी शेख हि महिला अंडापावची गाडी लावते . लारा याने तिच्या कडे २ हजार रुपये मागितले असता तिने नकार दिला . त्याचा राग येऊन लारा याने तिला अश्लील शिवीगाळ करत रस्त्यावर तुझे कपडे काढून बलात्कार करेन असे धमकावत तिला मारहाण करत बळजबरीने ओढून रस्त्यात नेले . तिच्या कमरे जवळील कुर्ता फाडला अश्या फिर्यादी वरून नवघर पोलिसांनी लारा ह्याला ५ एप्रिल रोजी रात्री अटक केली आहे . 

वास्तविक अमीन शेख सोबत झालेल्या घटने नंतर  प्रहार दिव्यांग क्रांती संस्थाच्या मीरा भाईंदर महिला अध्यक्ष काजल नाईक सह दिव्यांगांनी व महिलांनी संताप व्यक्त करत लारा याला तात्काळ अटक करण्याची मागणी चालवली होती . लारा नाडर हा न्यू गोल्डन नेस्ट - इंद्रलोक परिसरात हातगाडी - बाकडे लावणाऱ्यां कडून हप्ता गोळा करतो . हप्ता दिला नाही तर मारहाण , धमकावणे , तोडफोड असे प्रकार करतो . या भागात त्याला विचारल्या शिवाय कोणाला गाडी - बाकडं लावता येत नाही . तो स्वतः हप्ता घेऊन बाकडे - हातगाड्या लावत असल्याचा आरोप येथील प्रहार दिव्यांग क्रांती संस्थाच्या मीरा भाईंदर महिला अध्यक्ष काजल नाईक यांनी चालवला होता . 

जानेवारी महिन्यात देखील लारा याने क्रीडा संकुल जवळ चहाचा स्टॉल लावणाऱ्या जिलाजीत यादव व त्यांचा भाचा संदीप याला हप्ता दिला नाही म्हणून मारहाण केली . नाडर याने चहा घोटण्याच्या वस्तूने संदीपचे डोके फोडले व शिवीगाळ करत धमकी दिली .  या प्रकरणी नवघर पोलिसांनी २९ जानेवारी रोजी यादव यांच्या फिर्यादी वरून लारा वर गुन्हा दाखल केला होता . विशेष म्हणजे यादव यांच्या फिर्यादीत अमीना शेख हिच्या कडे नाडर हा २ हजारांचा महिना घेत होता . तिने पैसे नसल्याचे सांगितल्या वरून तिच्या गाडीवरील अंडी फोडून तिला शिवीगाळ , धमकी दिली होती  हे सुद्धा नमूद होते . 

परंतु नवघर पोलिसांनी लारा विरुद्ध ठोस आणि कठोर कारवाई न केल्याने पुन्हा त्याने अमीना यांच्यावर हल्ला केल्याचा संताप व्यक्त होत आहे . याच लारा याने एका दिव्यांग तरुणीला स्टॉल बांधण्यासाठी ५० हजार रुपये घेऊन फसवले त्या बद्दल मार्च महिन्यातच नवघर पोलीस ठाण्यात गुन्हा दाखल झाला होता .