काँग्रेसकडून आंबेडकरांचा अवमान, केंद्रीय रेल्वे मंत्री पीयूष गोयल यांचा आरोप

संसद चालू न देणे, अर्थसंकल्पासारख्या महत्त्वाच्या विषयावर चर्चा करू न देणे हा डॉ. बाबासाहेब आंबेडकराच्या संविधानाचा अवमान असल्याचे मत व्यक्त करून केंद्रीय रेल्वे मंत्री पीयूष गोयल यांनी डॉ. आंबेडकरांना निवडणुकीत पाडण्यासाठी काँग्रेसनेच उमेदवार दिला होता, असे खडेबोल गुरुवारी सुनावले.

ठाणे : संसद चालू न देणे, अर्थसंकल्पासारख्या महत्त्वाच्या विषयावर चर्चा करू न देणे हा डॉ. बाबासाहेब आंबेडकराच्या संविधानाचा अवमान असल्याचे मत व्यक्त करून केंद्रीय रेल्वे मंत्री पीयूष गोयल यांनी डॉ. आंबेडकरांना निवडणुकीत पाडण्यासाठी काँग्रेसनेच उमेदवार दिला होता, असे खडेबोल गुरुवारी सुनावले.
भाजपा खासदारांच्या देशव्यापी उपोषणात सहभागी होण्यासाठी ते गुरुवारी ठाण्यात आले होते. यावेळी त्यांच्या समवेत आमदार संजय केळकर, शहर अध्यक्ष संदीप लेले, माधवी नाईक, गटनेते मिलिंद पाटणकर, मनोहर डुंबरे आदींसह इतर नगरसेवक तथा पदाधिकारी उपस्थित होते.
काँग्रेसविरोधात आम्ही संसद अधिवेशन काळातच उपोषण करण्याचे ठरविले होते. परंतु, ही माहिती फुटल्याने काँग्रेसने घाईघाईत फसवे उपोषण केल्याचा आरोपही गोयल यांनी केला. जनहिताच्या गोष्टी करण्यापेक्षा दिखावू राजकारण त्यांच्याकडून केले जात असल्याचेही त्यांनी सांगितले. भाजपा सरकार हे दलितांचे बाजूने असून त्यांच्या विचारसरणीने आम्ही चालत आहोत. परंतु, काँगे्रसला हे खपत नसल्याने त्यांच्याकडून अशा प्रकारच्या कुरापती सुरू आहेत. शिर्डी संस्थांमधील भ्रष्टाचारा संदर्भात राहुल गांधी यांनी केलेल्या ट्टिव्ट बाबत गोयल यांना छेडले असता, त्यांनी सांगितले की, याबाबतचा खुलासा आम्ही पूर्वीच केला आहे. परंतु, काँग्रेसने टॅक्सबाबत किंबहुना त्यांनी कधी टॅक्स भरलेलाच नसल्याने, त्यांनी याबबात आरोप करणे चुकीचे असल्याचेही ते म्हणाले.
>सेल्फिस्टिक ठरले आकर्षण : भाजपाचे उपोषण सकाळी १० वाजता सुरू असणे अपेक्षित असताना सव्वा तास उशिराने ते सुरू झाले. त्यातही पक्षाच्या नगरसेविका गोयल उपोषण स्थळी आल्यानंतर एक तास उशिराने हजर झाल्या. त्यातही त्यातील काहींनी केवळ मोबाइलवर सेल्फी काढून आम्ही आंदोलनात सहभागी होतो, हे दाखविण्याचाच प्रयत्न केला. अगदी नट्टापट्टा व मेकअप करून त्यांनी या आंदोलनात सहभाग घेतला खरा. परंतु, अवघ्या १५ मिनिटातच मीडियांकडून फोटो शूट आणि गोयल यांचे निवेदन सादर झाल्यानंतर त्यांनी उपोषणाच्या ठिकाणाहून काढता पाय घेतला.