भिवंडीत पोलिसावर झाडली गोळी

नेम चुकला : दस्त्याने फोडले डोके, सरकारी कर्मचाऱ्यास अटक

भिवंडी : शासकीय सेवेतील कर्मचाऱ्याने गावठी रिव्हॉल्व्हरने पोलीसमित्राच्या घरात शिरून त्याच्यावर दोन गोळ्या झाडल्या; परंतु झटापटीत नेम चुकल्याने त्याच रिव्हॉल्व्हरच्या लोखंडी दस्त्याने पोलिसाच्या डोक्यावर प्रहार केल्याने तो जखमी झाला आहे. त्याला पकडण्यास गेलेल्या शेजाºयाच्या डोक्यावरही दस्त्याने प्रहार केल्याने या घटनेत दोघेजण जखमी झाले आहेत. पोलिसांनी आरोपी चंद्रकांत बाविस्कर यास अटक केली.

नितीन सपकाळे (४०) हे जखमी पोलिसाचे नाव आहे. आरोपी चंद्रकांत हे वांद्रे येथील एका शासकीय कार्यालयात मराठी अनुवादक म्हणून कार्यरत आहेत. दोघेही मूळचे जळगाव जिल्ह्यातील असून ते जुने मित्र आहेत. सपकाळे हे कशेळी येथे, तर चंद्रकांत बाविस्कर हे जवळच काल्हेर येथे राहतात. त्यांच्यात कौटुंबिक संबंध होते. पूर्ववैमनस्यातून चंद्रकांतने गुरुवारी कशेळी येथील सपकाळे याच्या घरात घुसून त्यांच्यावर गोळीबार केला. सपकाळे यांनी गोळी चुकवल्याने ती भिंतीत रुतून बसली. त्यानंतर, चंद्रकांतने त्यांच्या डोक्यात रिव्हॉल्व्हरचा दस्ता मारल्याने ते जखमी झाले. गोळीबाराच्या आवाजाने सकपाळेचा शेजारी अभिषेक यादव याने चंद्रकांतला पकडले. त्यावेळी त्याने अभिषेकच्या डोक्यातही रिव्हॉल्व्हरचा दस्ता मारला. सकपाळे यांना ताबडतोब काल्हेर येथील खाजगी रुग्णालयांत उपचाराकरिता दाखल केले आहे.