हॉटेल कामगार वृद्धानं पेट्रोल अंगावर ओतून पेटवून घेतलं; कुरुल येथील घटना

शासकीय रुग्णालयात उपचार सुरु.

विलास जळकोटकर, सोलापूर : हॉटेलमध्ये काम करणाऱ्या वृद्ध कामगारानं हॉटेलमालकाच्या शेतात स्वत:च्या अंगावर पेट्रोल ओतून घेऊन पेटवून घेण्याची घटना कुरुल (ता. मोहोळ) येथे बुधवारी सकाळी घडली. सुदर्शन राजाराम कांबळे (वय- ६०, रा. उपरी, जि. कोल्हापूर) असे भाजलेल्या वृद्धाचे नाव आहे. 

यातील भाजलेला वृद्ध हा दोन ते अडीच महिन्यांपूर्वी कुरुल येथील चंद्रकांत निकम यांच्या तिऱ्हे-पंढरपूर रोडवरील हॉटेलवर कामावर होते. रहायला निकम यांच्या शेतातील वस्तीवर राहत होते. बुधवारी सकाळी अज्ञात कारणावरुन सुदर्शन यांनी चंद्रकांत निकम यांच्या शेतातील चिंचेच्या झाडाखाली स्वत:च्या अंगावर पेट्रोल ओतून घेतले. यात त्यांच्या सर्वांगास भाजले.

या प्रकाराची माहिती कळताच हाॅटेलवरील नामदेव निकम यांनी घटनास्थळी धाव घेऊन भाजलेल्या अवस्थेत येथील शासकीय रुग्णालयात उपचारासाठी दाखल केले आहे. या प्रकाराची त्यांनी त्यांच्या नातेवाईकांना उपरी येथे माहिती दिली. सध्या भाजलेल्या सुदर्शन यांच्याजवळ चंद्रकांत निकम सोबतीला असल्याचे नामदेव निकम यांनी सांगितले. संबंधीत वृद्धावर उपचार सुरु असल्याचे डॉक्टरांनी सांगितले. या घटनेची सिव्हील पोलीस चौकीत नोंद करण्यात आली आहे.