गुप्तधनासाठी खड्डा खोदणा-या 11 जणांना अटक

दाभोळ, दि. 14 - जग २१व्या शतकाकडे झेपावत असताना समाजातील अंधश्रध्दा अजूनही मिटलेल्या नाहीत. दाभोळ येथे बंद घरात गुप्तधन पुरलेले आहे, अशा समजुतीने घरात खड्डा खोदणाºया अकराजणांविरुध्द दाभोळ पोलिस स्थानकात गुन्हा दाखल करून त्यांना अटक करण्यात आली आहे. ही घटना शनिवारी पहाटे घडली. 

 

दाभोळ सागरी पोलिस ठाण्याचे सहाय्यक पोलीस निरीक्षक दिनेश तायडे हे सहकाºयांसह पेट्रोलिंग करत असताना पहाटे २.३० वाजण्याच्या सुमारास दाभोळ वरचा विभाग येथे गणपती मंदिराच्या पुढील बाजूस नेहमी बंद असलेल्या घरात लाईट दिसला. त्या घरात खोदकामाचा आवाज येत असल्याने तायडे यांनी गाडी थांबवून घराचा दरवाजा वाजवला. दरवाजा उघडल्यानंतर पोलीस आत गेले असता त्यांना माजघरात एक मोठा खड्डा खणलेला दिसला. खड्ड्याच्या एका बाजूला माती पडलेली दिसली तर जवळच एकजण मंत्र उच्चारत होता. 

 

बाजूला हळद पिंजरीने रेषा आखलेल्या व खड्ड्यामध्ये नारळ, लिंबू असे साहित्य दिसून आले. या घरात आठ ते नऊ अज्ञात लोक व एक अनोळखी महिला दिसली. हे सारेजण पोलिसांना बघून लपण्याचा प्रयत्न करू लागल्याने घराच्या मालकाबाबत पोलिसांनी विचारणा केली. त्यांच्यापैकी दार उघडणाºयाने आपले नाव सांगून हे घर सध्या आपल्या ताब्यात असल्याचे सांगितले. त्यामुळे पोलिसांना आणखीन संशय आला. त्यांनी या साºयांची कसून चौकशी केली. 

 

आपली परिस्थिती खूपच नाजूक असून ती सुधारण्यासाठी भगताने सांगितल्यानुसार आपण गुप्तधन काढण्याच्या हेतूने हा विधी करत असल्याचे त्याने सांगितले. यापैकी दुसºयाने मंत्र म्हणणारा माणूस हा गुप्तधन काढून देण्याकरिता जादूटोणा करतो, असे सांगितले. या मांत्रिकाने दि. १३ जानेवारी रोजी दुपारी ३ वाजता मुंबई येथून दोन वाहने भरून माणसे खड्डा खोदण्यासाठी आणल्याचे त्यांनी सांगितले. 

 

पोलिसांनी तत्काळ पोलीस पाटील विनायक कुडाळकर यांना बोलावून घेतले. पोलिसांनी त्यांना सूचना करून घटनास्थळावर सापडलेले साहित्य हे त्याचठिकाणी ठेवून देण्यास सांगितले. याबाबत सहाय्यक पोलीस निरीक्षक तायडे यांनी स्वत: फिर्याद दिली आहे. त्यानुसार अकरा जणांविरूद महाराष्ट्र नरबळी आणि इतर अमानुष व अनिष्ठ अघोरी प्रथा व जादूटोणा यांना प्रतिबंध करणारा कायदा सन २०१३चे कलम ३(१) प्रमाणे तक्रार दाखल करण्यात आली आहे. 

 

१७ तारखेपर्यंत पोलीस कोठडी

 

या सर्व ११ आरोपींना पोलिसांनी अटक केली असून त्यांना शनिवारी न्यायालयासमोर हजर केले असता १७ तारखेपर्यंत पोलीस कोठडीत ठेवण्याचे आदेश न्यायालयाने दिले आहेत.