Pune: धमकी देत अल्पवयीन मुलासोबत 'ती' जबरदस्तीने ठेवायची शरीरसंबंध; Video क्लिपमुळे प्रकार उघड

पुण्यातून धक्कादायक प्रकार समोर...

किरण शिंदे 

पुणे : घराशेजारी राहणाऱ्या एका अल्पवयीन मुलाला पोलिसात तक्रार देण्याची धमकी देऊन त्याच्यासोबत जबरदस्तीने शरीर संबंध ठेवले. हा संपूर्ण प्रकार एका 28 वर्षीय महिलेने केला आहे. 17 वर्षीय पीडित मुलाने या प्रकरणी कोंढवा पोलीस ठाण्यात तक्रार दिली आहे. त्यानुसार 28 वर्षीय महिलेवर कोंढवा पोलीस ठाण्यात गुन्हा दाखल करण्यात आला आहे. मे 2021 ते नोव्हेंबर 2022 या कालावधीत दोन ते तीन वेळा हा प्रकार घडला. 

या प्रकरणी अधिक माहिती अशी की, फिर्यादी अल्पवयीन तरुण आणि आरोपी महिला कोंढवा परिसरात राहतात. दोघांचीही घरे जवळजवळ आहेत. आरोपी महिलेच्या पतीचे कोरोना काळात निधन झाले आहे. दरम्यान फिर्यादी तरुण हा अल्पवयीन आहे. हे माहीत असतानाही आरोपी महिलेने त्याच्यासोबत जबरदस्ती केल्याची पोलिसात तक्रार देईल अशी धमकी दिली आणि त्याची इच्छा नसतानाही जबरदस्तीने त्याच्यासोबत शरीर संबंध ठेवले. शरीर संबंध ठेवत असताना आरोपी महिलेने फिर्यादीला व्हिडिओ चित्रित करण्यास भाग पाडले. मे 2021 ते नोव्हेंबर 2022 या कालावधीत आरोपी महिलेने दोन ते तीन वेळा जबरदस्तीने हा संपूर्ण प्रकार केला. 

दरम्यान आरोपी महिलेच्या मोबाईलमध्ये यासंबंधीची व्हिडिओ क्लिप असल्याचे लक्षात आल्यानंतर पीडित अल्पवयीन मुलाच्या कुटुंबीयांनी पोलिसात धाव घेतली. त्यांनी या संबंधित तक्रार दिली आणि पोलिसांनी गुन्हा दाखल केला आहे.