रिक्षाचे भाडे न दिल्याने चालकाने केला अल्पवयीन मुलीवर बलात्कार, पुण्यातील धक्कादायक घटना

याप्रकरणी एका 16 वर्षीय अल्पवयीन मुलीने तक्रार दिली आहे...

पुणे: पुण्यात एक धक्कादायक घटना उघडकीस आली आहे. शहरातील रेसकोर्स परिसरात एका रिक्षाचालकाने अल्पवयीन मुलीवर बलात्कार केल्याचा धक्कादायक प्रकार उघडकीस आला आहे. प्रवास करणाऱ्या या मुली जवळ रिक्षाचे भाडे देण्यासाठी पैसे नव्हते. याचाच फायदा घेऊन संबंधित रिक्षाचालकाने या मुलीला रेसकोर्स जवळील एका झाडीत नेले आणि तिथे तिच्यावर बलात्कार केला. पोलिसांनी याप्रकरणी गुन्हा दाखल करत रिक्षाचालकासह तिघांना अटक केली आहे. सागर बिभीषण बचुटे (वय 24), विकी कुमार फुलो पासवान (वय 23) आणि अशोक विर बहादुर थापा (वय 23) अशी अटक करण्यात आलेल्या आरोपींची नावे आहेत.

याप्रकरणी एका 16 वर्षीय अल्पवयीन मुलीने तक्रार दिली आहे. गेल्या वर्षी डिसेंबर महिन्यात आणि 5 जानेवारी 2019 रोजी हा प्रकार घडला. पोलिसांनी दिलेल्या माहितीनुसार, बुधवारी फिर्यादी आणि तिची मैत्रीण रिक्षाने प्रवास केला. यावेळी फिर्यादी आणि त्यांचा मैत्रिणीकडे पैसे नसल्याचा गैरफायदा घेऊन आरोपीने रेसकोर्स समोरील झाडीमध्ये नेऊन फिर्यादी बरोबर शारीरिक संबंध ठेवले. 

तर डिसेंबर 2021 च्या दुसऱ्या आठवड्यात फिर्यादी या फुरसुंगी परिसरात राहत असताना त्यांच्या ओळखीचे असलेल्या इतर आरोपींनी फिर्यादी आणि त्यांच्या मैत्रिणी सोबत जबरदस्ती करण्याचा प्रयत्न करून त्यांची छेड काढली. दरम्यान तक्रार आल्यानंतर हडपसर पोलिसांनी या प्रकरणी बलात्कार आणि पॉस्को अंतर्गत गुन्हा दाखल करून आरोपींना अटक केली आहे. अधिक तपास सुरू आहे.