परभणीत आणखी एक झाड कोसळले; स्टेशन रोडवर वाहतूक ठप्प 

मध्यरात्रीपासून या मार्गावरील वाहतूक ठप्प झाली होती.

ठळक मुद्दे शुक्रवारी मध्यरात्री शहरात सोसाट्याच्या वाऱ्यासह पाऊस झाला. या वाऱ्यामुळे स्टेशनरोडवरील वडाचे झाड रस्त्यावर आडवे झाले.

परभणी : येथील स्टेशन रोड परिसरातील वस्तू आणि सेवा कर कार्यालय जवळील एक जुने झाड शुक्रवारी मध्यरात्री रस्त्यावर आडवे झाल्याची घटना घडली आहे. त्यामुळे स्टेशन रोड परिसरातील वाहतूक सकाळी  १०  वाजेपर्यंत खोळंबली होती.

येथील रेल्वेस्थानक परिसरामध्ये वस्तू आणि सेवा कर कार्यालय असून, या कार्यालयाच्या संरक्षक भिंत जवळील वडाची जुनी झाड आहेत. शुक्रवारी मध्यरात्री शहरात सोसाट्याच्या वाऱ्यासह पाऊस झाला. या वाऱ्यामुळे स्टेशनरोडवरील वडाचे झाड रस्त्यावर आडवे झाले. त्यामुळे मध्यरात्रीपासून या मार्गावरील वाहतूक ठप्प झाली होती. शनिवारी सकाळी नऊ वाजण्याच्या सुमारास सार्वजनिक बांधकाम विभागाच्या कर्मचाऱ्यांनी रस्त्यावर आडवे झालेले झाड बाजूला करण्याचे काम सुरू केले होते. साधारणतः पंचवीस-तीस वर्षांपूर्वी जुने झाड पडल्याने झाडांच्या संवर्धनाचा प्रश्न निर्माण झाला आहे. विशेष म्हणजे, शुक्रवारी सकाळी ११ वाजता शहरातील जायकवाडी भागात एक झाड कोसळल्याची घटना घडली होती. त्यानंतर स्टेशन रोड भागात झाड  पडल्याची घटना घडली.

परभणीत जायकवाडी समोरील रस्त्यावर कोसळले झाड; महिला बालंबाल बचावली 

परभणी जिल्ह्यात वृक्षारोपण मोहीम राबविली जात आहे. जिल्ह्याला १ कोटी १९ लाख झाडे  लावण्याचे उद्दिष्ट देण्यात आले आहे. एकीकडे पावसाअभावी वृक्षारोपण मोहिमेत अडथळे निर्माण होत असताना दुसरीकडे वीस ते पंचवीस वर्षांपूर्वीची जुनी झाडे जमीनदोस्त होत असल्याने जिल्हावासीयांना समोर ही एक नवी समस्या निर्माण झाली आहे. त्यामुळे आता वृक्षारोपणा बरोबरच जुन्या झाडांचे संवर्धन करण्याकडेही प्रशासनाला लक्ष द्यावे लागणार आहे.

झाड अचानक मुळापासून उन्मळून रस्त्यावर पडले. https://t.co/Wd7UhcaOuv

— Lokmat Aurangabad (@milokmatabd) July 13, 2019