शक्तीमान घोडयाला मारहाण करणा-या भाजप आमदाराला अटक

सुरी येथे भाजपच्या आंदोलना दरम्यान शक्तीमान या घोडयाला अमानुष मारहाण करणारा भाजप आमदार गणेश जोशीला डेहराडून येथे पोलिसांनी अटक केली आहे.

ऑनलाइन लोकमत 

डेहारडून, दि. १८ - मसुरी येथे भाजपच्या आंदोलना दरम्यान शक्तीमान या घोडयाला अमानुष मारहाण करणारा भाजप आमदार गणेश जोशीला डेहराडून येथे पोलिसांनी अटक केली आहे. उत्तराखंडचे मुख्यमंत्री हरिश रावत यांनी फंडाचा गैरवापर केल्याचा आरोप करत दोन-तीन दिवसांपूर्वी गणेश जोशीने समर्थकांसह आंदोलन केले होते. 

यावेळी आंदोलकांना रोखण्यासाठी घोडयावरुन आलेल्या पोलिसांवर जोशी व त्याच्या समर्थकांनी हल्ला चढवला, त्याचवेळी जोशींनी शक्तीमान घोड्यावरही हल्ला केला. 

त्यांनी सुरवातीला घोड्याच्या तोंडावर दांडुका मारला, त्यांनतर त्याच्या पायावर प्रहार केल्याने घोडा खाली कोसळला. गणेश जोशींनी केलेल्या अमानुष मारहाणीत शक्तीमानला आपला पाय गमवावा लागला. 

गुरुवारी डॉक्टरांनी शक्तीमानच्या पायावर शस्त्रक्रिया करुन त्याला तात्पुरता कुत्रिम पाय बसवला आहे. शक्तीमान आता स्वत:च्या पायावर उभा राहू शकला असला तरी, लवकरच त्याला कायमस्वरुपी कुत्रिम पाय बसवणार असल्याचे डॉक्टरांनी सांगितले. शक्तीमान १४ वर्षांचा आहे.