पतीने केले पत्नीच्या गळ्यावर चाकूने वार

घर बांधण्यासाठी आत्ताच्या आत्ता एक लाख रुपये दे, असे म्हणून पत्नीच्या गळ्यावर चाकूने वार करून, तिला जीवे ठार मारण्याचा प्रयत्न केल्याप्रकरणी गुन्हा दाखल करण्यात आला आहे.

नाशिक रोड : घर बांधण्यासाठी आत्ताच्या आत्ता एक लाख रुपये दे, असे म्हणून पत्नीच्या गळ्यावर चाकूने वार करून, तिला जीवे ठार मारण्याचा प्रयत्न केल्याप्रकरणी गुन्हा दाखल करण्यात आला आहे.

वडाळा नाका, नागसेन येथे राहणाऱ्या सुमन राजपूत जाधव यांचे पतीसोबत पटत नसल्याने, त्या दोन महिन्यांपासून मुलीसह देवळाली गावातील गांधीधाम येथे आईकडे राहण्यास आल्या आहेत. सोमवारी सायंकाळी साडेपाचच्या सुमारास सुमन जाधव यांची आई व भाचा घरी असताना, पती राजीव निवृत्ती जाधव हा तेथे आला. मला आत्ताच्या आत्ता घर बांधण्यासाठी एक लाख रुपये दे, असे म्हणून शिवीगाळ करून लागला. तू येथे मजा करते, मी तुला जिवंत ठेवणार नाही, असे म्हणून खिशातून चाकू काढून पत्नी सुमनच्या गळ्यावर वार केला. दुसरा वार करत असताना, सुमनने तो वार चुकविण्यासाठी हात वर केला असता, हाताच्या बोटावर चाकूने दुखापत झाली. या प्रकरणी उपनगर पोलीस ठाण्यात गुन्हा दाखल करण्यात आला आहे.