गैरसोय टाळण्यासाठी चेकऐवजी ऑनलाइन वीजबील भरा, महावितरणचे आवाहन

 वीजबिल भरण्यासाठी महावितरणने ग्राहकांना ऑनलाइन सुविधा उपलब्ध करुन दिल्या आहेत. त्यामुळे आर्थिक भुर्दंड व वीजपुरवठा खंडित होण्याची कारवाई व गैरसोय टाळण्यासाठी लघुदाब वीजग्राहकांनी धनादेशाऐवजी (चेक) महावितरणच्या वेबसाईट किंवा मोबाईल अॅपद्वारे वीजबिलाचा ऑनलाइन भरणा करावा, असे आवाहन महावितरणने केले आहे. 

मुंबई : वीजबिल भरण्यासाठी महावितरणने ग्राहकांना ऑनलाइन सुविधा उपलब्ध करुन दिल्या आहेत. त्यामुळे आर्थिक भुर्दंड व वीजपुरवठा खंडित होण्याची कारवाई व गैरसोय टाळण्यासाठी लघुदाब वीजग्राहकांनी धनादेशाऐवजी (चेक) महावितरणच्या वेबसाईट किंवा मोबाईल अॅपद्वारे वीजबिलाचा ऑनलाइन भरणा करावा, असे आवाहन महावितरणने केले आहे. 

धनादेशाद्वारे वीजबिलाचा भरणा केल्यास कोणत्याही कारणामुळे धनादेश बाऊंस होण्याची शक्यता असते.  सद्यस्थितीत महावितरणचे दरमहा सुमारे 7 लाख ग्राहक वीज बिलाचा भरणा धनादेशाद्वारे करीत आहेत. त्यापैकी साधारणत: 10,000 धनादेश दरमहा बाऊंस होतात. त्यामुळे ग्राहकांना 350 रुपये दंड, धनादेश अंतिम मुदतीच्या तारखेनंतर वटल्यास पुढील बिलात लागून येणारी थकबाकी यासह सदर ग्राहकाची पुढील सहा महिने धनादेशाद्वारे वीजबिल भरण्याची सुविधा स्थगित केली जाते. तसेच धनादेश बाऊंस होणे हा पराक्राम्य संलेख 1881 च्या कलम 138 अंर्तगत दखलपात्र फौजदारी गुन्हा आहे. 

रिर्झव्ह बँकेच्या नियमांप्रमाणे, धनादेश वटण्यास साधारणत: तीन ते चार दिवसांचा कालावधी लागतो. धनादेश वटल्यानंतरच बिलाची रक्कम प्राप्त झाल्याची नोंद ग्राहकांच्या खात्यावर होते. अनेक ग्राहक अंतिम मुदतीच्या एक-दोन दिवसा अगोदर धनादेशाद्वारे वीजबिलाची रक्कम भरतात. त्यामुळे मुदतीनंतर वीजबिलाचा भरणा  झाल्यास संबंधित ग्राहकांना धनादेशाद्वारे भरलेली रक्कम थकबाकी म्हणून पुढील बिलात लागून येते किंवा कोणत्याही कारणाने धनादेश बाऊंस झाला तर आर्थिक दंडासह वीजपुरवठा खंडित करण्याची कारवाई केली जाते. काही ठिकाणी एखादी व्यक्ती 15 ते 20 वीजग्राहकांच्या वीजबिलांची रक्कम रोख स्वरुपात घेऊन ती धनादेशाद्वारे भरते. यात धनादेश बाऊंस झाल्यास त्याचा वीजग्राहकांना नाहक आर्थिक फटका बसू शकतो व त्यांचा वीजपुरवठाही खंडित होऊ शकतो. 

या सर्व त्रासापासून वाचण्यासाठी व घरबसल्या वीजबिल भरण्यासाठी महावितरणची www.mahadiscom.in ही वेबसाईट व मोबाईल अॅपची सोय उपलब्ध आहे. इंटरनेट व मोबाईल अॅपच्या माध्यमातून सद्यस्थितीत सुमारे 35 लाख वीजग्राहक सुमारे 600 कोटी रुपयांचा दरमहा वीजबिल भरणा करीत आहेत. त्यामुळे धनादेशाऐवजी वीजग्राहकांनी या सुविधांचा लाभ घ्यावा, असे आवाहन महावितरणकडून करण्यात आले आहे.