महाराष्ट्रवादी गोमंतक पक्ष अस्तित्वाच्या कड्यावर 

मगो पक्ष ढवळीकरांच्या ताब्यातून सोडवून त्याला ऊर्जितावस्था मिळावी यासाठी प्रयत्न सुरू झाले आहेत.

- राजू नायक
महाराष्ट्रवादी गोमंतक पक्षाने निवडणुकीत भाजपशी सवतासुभा उभा केल्यामुळे सत्ताधारी पक्षाला दक्षिण गोवा लोकसभा निवडणूक जिंकता आली नाही. परंतु एक जागा कमी झाल्याने भाजपला फारसा फरक पडला नाही. कारण शिरोडय़ासह, मांद्रे व म्हापसा या विधानसभेच्या जागा पदरी पडल्या. त्यामुळे त्यांचे गोव्यातील सरकार भक्कम झाले.

आता महाराष्ट्रवादी गोमंतक पक्षाच्या (मगोप) अस्तित्वाचा प्रश्न निर्माण झाला आहे. गेली २० वर्षे या ना त्या पक्षाची साथ करीत हा पक्ष सत्तेची ऊब घेत राहिला. कधी त्या पक्षाने संघटनात्मक बांधणी केली नाही की कधी पक्ष वाढविण्याचा प्रयत्न केला नाही. याचे कारण सुदिन ढवळीकरांना पक्ष वाढविला तर आपल्या हातातून सुटेल अशीच नेहमी भीती वाटली.

ढवळीकरांच्या घरातच सध्या हा पक्ष अंग चोरून उभा आहे. सुदिन ढवळीकर व त्यांचे  बंधू दीपक- जे मगोपचे अध्यक्ष आहेत, पक्षाची धुरा सांभाळतात. २०१७च्या निवडणुकीत दीपक यांचा शेजारच्या प्रियोळ विधानसभा मतदारसंघात पराभव झाला. परंतु सत्तेविना अस्वस्थ असल्याने शिरोडा मतदारसंघात पोटनिवडणूक जाहीर होताच, तेथे नशीब अजमावण्याचा त्यांनी चंग बांधला.

सरकारात स्थैर्य निर्माण करण्यासाठी भाजपने काँग्रेस पक्षाचे शिरोडा व मांद्रे मतदारसंघाचे आमदार फोडून भाजपमध्ये आणले. तो व्यूहरचनेचा भाग असल्याने सरकारचा घटक पक्ष असलेल्या मगोपने ती जागा लढवू नये यासाठी भाजपने प्रयत्न केले व नितीन गडकरी यांचीही शिष्टाई कामी आली नाही. मगोप ताठर भूमिका घेण्याचे आणखी एक कारण सुदिन ढवळीकरांची मुख्यमंत्री बनण्याची महत्त्वाकांक्षा. हा पक्ष सध्या एकच सदस्यीय आहे; परंतु पोटनिवडणुकीत भाजपला पराभव सहन करावा लागून गोव्यातील सरकार कोसळले तर काँग्रेसच्या पाठिंब्याने आपल्याला मुख्यमंत्रिपदाची गादी मिळेल असे मांडे ढवळीकर खात होते. काँग्रेस पक्षाने यापूर्वीही ढवळीकरांना मुख्यमंत्रिपदाची ऑफर दिली आहे.

दुर्दैवाने शिरोडा मतदारसंघात दीपक ढवळीकरांचा पराभव झाला. राजकीय निरीक्षकांच्या मते ढवळीकरांनी तेथे हातातील सारी संसाधने वापरण्यात कुचराई केली नाही. केंद्रात मोदींचे भरभक्कम सरकार आल्यानंतर जो काँग्रेस राज्यात सरकार स्थापन करण्याची स्वप्ने पाहात होता, त्याचेही अस्तित्व धोक्यात आहे व ढवळीकरांच्या नेतृत्वाला शह दिला जाऊ शकतो. मगोपमधील एक घटक पक्षाचे नेतृत्व बहुजन समाजाकडे सोपवावे व पक्षाने रितसर बांधणी करावी यासाठी प्रयत्नशील आहे. ढवळीकर बंधूंनी पक्षातून हाकललेले माजी आमदार लवू मामलेदार यांना मानाने पक्षात घ्यावे यासाठीही चळवळ उभारली जाणार आहे. तसे घडले नाही तर हा पक्ष लवकरच विस्मरणात जाईल अशीच भीती आहे.
(लेखक गोवा आवृत्तीचे संपादक आहेत.  )