How to seduce as old BJP? | जुने भाजपावाले म्हणून किती लाड करायचे?

छगन भुजबळांचे खंदे समर्थक असणाºया व राष्ट्रवादीची सत्ता जाताच सत्तापक्षात प्रवेश करणा-या प्रसाद लाड यांना भाजपाने विधान परिषदेचे तिकीट दिले. यात काय चूक? उगाच आम्ही वर्षानुवर्षे पक्षासाठी काम करतोय, असे सांगत एकाच पक्षात अनेक वर्षे चिटकून राहणा-यांनी एकदम संताप करण्याचे कारण नाही. सत्ता वाढवण्यासाठी हे करावेच लागते. पण सतत बौद्धिक चर्चेत अडकलेल्या पक्ष प्रवक्त्यांना या गोष्टी नाही कळणार.
शंभर वर्षाच्या काँग्रेसला संपवायचे तर या गोष्टी कराव्या लागणार. काहीही देण्याची वेळ आली की यांना वाटते ‘मीच लाभार्थी...!’ एवढे ‘लाड’ नाही जमणार! बरं काही द्यायचे ठरवले तरी एकाही प्रवक्त्याची ना एसआरए योजना ना धनसंचय करण्याची क्षमता. यांना साधे मुख्यमंत्र्यांच्या मागेपुढेही करता येत नाही. मात्र दुसºयांना काही दिले की हे रुसतात. पक्ष वाढीसाठी काँग्रेसच्या आर.एन. सिंह यांना आमदारकी दिली. त्यामुळे उत्तर भारतीयांच्या मनात भाजपाबद्दल आदर वाढला. मनसे संपवायची म्हणून प्रवीण दरेकरांना पक्षात घेऊन आमदारकी दिली तर हेच जुने भाजपावाले म्हणतात, मुंबै बँकेच्या भानगडी लपवायच्या म्हणून दरेकर भाजपात आले. त्याचा काय संबंध त्यात? नागपूरचे मूळ काँग्रेसी, नंतर अपक्ष नगरसेवक म्हणून काम करणारे परिणय फुके यांना भाजपात घेऊन आमदारकी दिली पण त्याचेही कौतुक नाही. आता ते किती कामे करून घेतात, याकडेच सगळ्यांचे लक्ष...! कधीकाळी काँग्रेसमध्ये असणाºया मुन्ना यादवना भाजपात घेऊन असंघटित कामगार कल्याण मंडळाचे अध्यक्षपद दिले. या मंडळाकडे सात हजार कोटी रुपये आहेत. त्यातून ते कामगारांचे कल्याण करतील शिवाय नागपुरात काँग्रेस कमकुवत करतील. असा दुहेरी विचार करणाºयांवर टीका होते. जुन्या भाजपावाल्यांचे वय वाढले तसे विचारही जुने होत चाललेत. विधिमंडळातून निवृत्त झालेले गोपाळ दळवी पक्ष कार्यालय मंत्री म्हणून काम पाहात होते. त्यांना सिध्दीविनायक ट्रस्टचे सदस्यत्व दिले तर बिघडले कुठे? तर जुने भाजपावाले म्हणतात, त्यांनी पक्षासाठी काय केले? भाजपाने शिवसेनेचाही विचार केला. पुण्याचे बिल्डर विशाल चोरडियांना शिवसेनेने पक्षात घेताच खादी ग्रामोद्योग मंडळाचे अध्यक्षपद दिले. तर जुने भाजपावाले म्हणतात, आणखी डझनभर महामंडळे रिकामी का ठेवली. तीन वर्षे लागतात का भरायला? यांना कसे सांगणार, पक्ष वाढीसाठी बाहेरून पक्षात येणाºयांसाठी अशी मंडळ रिकामी ठेवावी लागतात.
माजी आदिवासी विकास मंत्री बबनराव पाचपुते, विजयकुमार गावित, ज्यांच्या काळात नांदेड, परभणीच्या जिल्हा बँका अडचणीत आल्या ते काँग्रेसचे भास्करराव खतगावकर व राष्टÑवादीचे रामप्रसाद बोर्डीकर यांना पक्षात घेऊन त्यांच्या जिल्ह्यात भाजपा वाढवण्याचे काम केले ना. माधव भांडारी हे संघाचे काम करणाºया व्ही.सतीश यांचे मेहुणे. त्यांचे वडील संघाचे कट्टर; म्हणून का त्यांना आमदारकी द्यायची का? केशव उपाध्येंना प्रवक्तेपद दिले ना... यापेक्षा जास्त काय देणार? प्रसाद लाड यांचा अर्ज भरताना नक्की हजर राहा, असा निरोप दिलाच होता की सगळ्यांना. अजून नारायण राणेंची सोय लावायची चिंता असताना हे मधेच लुडबूड करू लागले तर पक्ष कसा वाढणार?
सध्या राजकीय फेरीवाल्यांचे दिवस चांगले आहेत असे बाळा नांदगावकर म्हणाले. यांच्या हातगाडीवर माल नाही म्हणून कुणी जात नाही त्यांच्याकडे. आपल्यासारख्या फेरीवाल्यांना दारोदार माल विकावा लागतो. भाजपाने किमान कौशल्य विभागाला गती दिलीय. पक्षाकडे एवढे प्रवक्ते. पण एकाकडेही लाडाने माध्यमांना कसे हाताळावे याचे किमान कौशल्यसुध्दा नाही. त्यांनी आता लाडांकडून प्रसादरुपी क्लास घ्यायला हरकत नाही.
जाता जाता : चांगली स्कॉच किंवा व्हिस्की बनविण्यासाठी मळीच वापरावी लागते. या विधानाचा तसा संबंध नाही.
 kkatual@gmail.com