दुर्मिळ खवल्या मांजराची 40 लाखांमध्ये तस्करी करणाऱ्या दुकलीला अटक 

ठाणे गुन्हे शाखेच्या मध्यवर्ती शोध पथकाची कामगिरी

ठाणे - दुर्मिळ प्रजातीच्या खवले मांजराची ४० लाखांमध्ये विक्री करण्याच्या तयारीमध्ये असलेल्या सागर पवार (33, फलपाडा, विरार, जि. पालघर ) आणि अब्दुल महामृत (54, रा. साई, जि. रायगड) या दोघांना ठाणो गुन्हे अन्वेषण विभागाच्या मध्यवर्ती शोध कक्षाच्या पथकाने मंगळवारी जेरबंद केल्याची माहिती पोलीस उपायुक्त दीपक देवराज यांनी दिली. त्यांच्याकडून खवल्या मांजर या वन्य जीवाची सुटका करण्यात आली आहे.

दुर्मिळ खवल्या मांजराची तस्करी करण्यासाठी सागर आणि अब्दुल येणार असल्याची माहिती पोलीस हवालदार शरद तावडे यांना मिळाली होती. याच माहितीच्या आधारे ठाण्याच्या वनक्षेत्रपालांशी पत्रव्यवहार करुन वन विभागाचे कर्मचारी घेऊन मंगळवारी दहिसर मुंब्रा या भागात उपायुक्त देवराज यांच्या मार्गदर्शनाखाली वरिष्ठ पोलीस निरीक्षक अनिल होनराव यांच्या पथकाने सापळा रचून या दोघांना ताब्यात घेतले. त्यांच्याकडील एका प्लास्टीकच्या गोणपाटातून दुर्मीळ प्रजातीचे नामशेष होत चाललेले संरक्षित वन्यजीव खवले मांजर (इंडियन पॅनगोलिन) हस्तगत करण्यात आले. त्यांनी ते दहा लाखांमध्ये खरेदी केले होते. त्याची ते परदेशामध्ये 40 लाखांमध्ये विक्री करणार होते, त्यपूर्वीच ठाणो पोलिसांनी त्यांना शिताफीने पकडले. त्यांच्याशी निगडीत आणखी कोणती टोळी आहे का? ते याची विक्री कोणाला करणार होते? आदींबाबत चौकशी करण्यात येत असल्याचे पोलिसांनी सांगितले.