भंडारा : विवाहाच्या नावावर एका अल्पवयीन मुलीची पाचवेळा विक्री केल्याप्रकरणी पोलिसांनी १५ आरोपींना अटक केली. भंडारा स्थानिक गुन्हे शाखेच्या पथकाने ही कारवाई केली. 

आरोपींमध्ये शिल्पा मेश्राम, कार्तिक मेश्राम रा.केसलवाडा (वाघ), प्रकाश मस्के रा.तेढा, ललीता, विनोद गायधने, विजय सिंघल रा.दिल्ली, समाधान पाटील रा.कंडारी, संजय उर्फ दीपक महाजन रा.एरंडोल, जि. जळगाव, किरण समरीत रा.डोंगरगाव, विनोद उर्फ बाबा मेहर रा.मोहाडी, छोटेलाल पटले, चैनलाल पटले रा. डव्वा, विनोद वैद्य रा.केसलवाडा यांचा समावेश आहे. 

जवाहरनगर पोलीस ठाण्याच्या हद्दीत येणा-या एका अल्पवयीन पीडित मुलीने आईसह नोंदविलेल्या तक्रारीनुसार, पीडित मुलीची दोन वर्षांपुर्वी शिल्पा नामक महिलेसोबत जिल्हा रूग्णालयात ओळख झाली. ओळखीचा फायदा घेत शिल्पाने तिला लाखनी येथे नेले. त्यानंतर १३ सप्टेंबर २०१६ ते २३ सप्टेंबर २०१७ या कालावधीत मुख्य आरोपी शिल्पा आणि अन्य लोकांनी संगनमत करून पैशाच्या हव्यासापोटी तिचे पाच वेगवेगळ्या ठिकाणी पैसे घेऊन लग्न लावून दिले. ज्या लोकांशी तिचा विवाह करून दिला होता त्यांनी तिचे शारीरिक शोषण केले. याशिवाय मुख्य आरोपी शिल्पा आणि कार्तिक मेश्राम या दोघांनी बाहेरील पुरूषांना घरी बोलावून त्यांच्याकडून पैसे घेत  दारू पाजून व नशेच्या गोळ्या देऊन तिचे वारंवार शोषण केले.  

पीड़ितेच्या तक्रारीवरून जवाहरनगर पोलिसांनी भादंवि ३६३, ३६६ (अ), ३७२, ३७६,  (आय), (जे), (के), (एन) व ३४ तथा बाल लैगिंक अत्याचार प्रतिबंधक अधिनियमाच्या ४, ८. १२ कलमान्वये गुन्हा दाखल केला होता. प्रकरणाचे गांभीर्य लक्षात घेऊन जिल्हा पोलीस अधीक्षक विनीता साहू यांनी या प्रकरणाचा तपास स्थानिक गुन्हे शाखेचे वरिष्ठ पोलीस निरीक्षक सुरेशकुमार घुसर यांच्याकडे सोपविला. गुन्हे शाखेच्या पथकाने या प्रकरणातील सर्व १५ आरोपींना विविध ठिकाणाहून अटक केली. 

आतापर्यंत केलेल्या कारवाईत या अल्पवयीन मुलीला जळगाव, राजस्थान राज्यातील जोधपूर आरि बाडमेर आणि नवी दिल्ली सह अनेक ठिकाणी तिला विकण्यात आले होते. यादरम्यान आरोपींकडून केलेल्या शारीरिक शोषणामुळे पीडिता गर्भवती आहे. याप्रकरणात आणखी काही आरोपी असण्याची शक्यता असून त्यांनाही अटक करण्यात येणार आहे.

- सुरेशकुमार घुसर, पोलीस निरीक्षक, स्थानिक गुन्हे शाखा भंडारा.


Get Latest Marathi News & Live Marathi News Headlines from Politics, Sports, Entertainment, Business and local news from all cities of Maharashtra.