बीडमध्ये रिक्षा चालकाने प्रवाशास पुन्हा लुटले

बीड : रात्रीच्या वेळी बीड बसस्थानकातून रिक्षात बसून घराकडे निघालेल्या वृद्धास रस्त्यातच रिक्षाचालक व त्याच्या साथीदाराने मारहाण करुन लुटले. महिन्यापूर्वीच असाच प्रकार घडला होता. रिक्षा चालकांच्या या वर्तवणुकीमुळे सर्वसामान्यांमध्ये दहशतीचे वातावरण निर्माण झाले आहे. दरम्यान, मारहाणीत वृद्ध गंभीर जखमी झाला असून, त्याच्यावर जिल्हा रुग्णालयात उपचार सुरू आहेत.

बाबासाहेब हरिभाऊ तायड (वय ५०, रा. अंकुशनगर) असे मारहाण झालेल्या प्रवाशाचे नाव आहे. तायड हे बाहेरगावाहून रात्रीच्या वेळी बसने स्थानकात आले. उतरल्यानंतर ते येथीलच एका रिक्षात बसून घराकडे निघाले. अंकुशनगरजवळ जाताच आजुबाजूला कोणी नसल्याचा फायदा घेत चालकाने रिक्षा थांबविला. आपल्या साथीदाराच्या मदतीने तायड यांना धमकी देत त्यांच्याजवळील पैशाची मागणी केली.

याला विरोध केल्याने तायड यांना रिक्षाचालकासह त्याच्या साथीदाराने मारहाण करण्यास सुरुवात केली. यामध्ये तायड गंभीर जखमी झाले. रिक्षा चालकाने तायड यांच्या खिशातील रोख १५ हजार रुपये काढून घेत तेथून पळ काढला. तायड यांनी जिल्हा रुग्णालय गाठले. माहिती समजताच शिवाजीनगर पोलिसांनी घटनास्थळी धाव घेतली. लुटारुंचा शोध घेतला परंतु मिळाले नाहीत, शिवाजीनगर ठाण्यात दोघांविरुद्ध गुन्हा नोंद झाला आहे.