माजलगावात दागिने लुटणारी महिलांची टोळी गजाआड

या टोळीत चार महिलांसह एका पुरूषाचा समावेश आहे.

ठळक मुद्देमाजलगाव शहर पोलिसांची कामगिरी एका पुरूषाचाही समावेश

माजलगाव (बीड ) : बसमध्ये चढताना गर्दीचा फायदा घेत महिलांचे दागिनले लंपास करणाऱ्या महिलांच्या टोळीला गजाआडा करण्यात आले आहे. ही कारवाई माजलगाव शहर पोलिसांनी रविवारी सायंकाळी माजलगाव बसस्थानकात केली. या टोळीत चार महिलांसह एका पुरूषाचा समावेश आहे. या कारवाईने गुन्हेगारांमध्ये खळबळ उडाली आहे.

सोयाबीन हरिभाऊ भोसले (१९ रा.सावरगाव) सुभाष सोमाजी उमाप (४५ रा.ब्रम्हगाव) धूपता परमेश्वर जाधव (५० रा.गांधीनगर, बीड), शोभा संजय भालेराव (४० रा.रमाई चौक, बीड),  मंगल सतीश तुसाबर (४२ रा.बलभीमनगर, बीड) अशी पकडलेल्या टोळीतील आरोपींची नावे आहेत. सादोळा येथील माधुरी सोळंके या बीडला आपल्या माहेरी जाण्यासाठी माजलगाव बसस्थानकात आल्या. बराचवेळ थांबूनही बस आली नाही. दुपारी ३ वाजेच्या सुमारास बीडसाठी बस येताच तिच्यात बसण्यासाठी एकच गर्दी झाली. हीच संधी साधून त्यांच्या गळ्यातील अडीच तोळ्याचे गंठल चोरट्यांनी लंपास केले. बसमध्ये बसल्यावर त्यांना हा प्रकार लक्षात आला. त्यांनी तात्काळ शहर पोलीस ठाणे गाठले.

पोलीस निरीक्षक सय्यद सुलेमान, पोउपनि एस.एस.बिराजदार यांनी स्थानकात धाव घेत कॅमेरे तपासले. यावेळी त्यांना काही महिलांवर संशय आला. सायंकाळी पाच वाजेच्या सुमारास त्यांनी सोयाबीन आणि सुभाषला ताब्यात घेतले. पोलीस हिसका दाखविताच त्यांनी आपल्या इतर साथीदारांची नावे सांगितले. त्यानंतर रविवारी रात्रीच माजलगाव पोलीस बीडमध्ये आले. त्यांनी आणखी तीन महिलांना ताब्यात घेतले. सोमवारी त्यांना न्यायालयात हजर करण्यात आले. न्यायालयाने त्यांना ६ फेब्रुवारीपर्यंत पोलीस कोठडी सुनावली आहे.

ही कारवाई पोलीस अधीक्षक जी.श्रीधर, अपर अधीक्षक अजित बोºहाडे, पोनि सय्यद सुलेमान यांच्या मार्गदर्शनाखाली पोउपनि एस.एस.बिराजदार, सफौ. सुंदर पवार, पोना किशोर राऊत, श्रीमंत पवार, संजिवणी सोन्नर आदींनी केली.

हमाली बनून महिलांवर वॉच
सुभाष हा बसस्थानकातच हमाली करतो. महिलांच्या गळ्यातील दागिने, पोलीस आहेत का? या सर्व गोष्टींचा आढावा घेऊन या महिला चोरट्यांना देतो. त्यानंतर या महिला संधी साधून धक्काबुक्की  आणि गर्दी करीत महिलांच्या गळ्यातील दागिने लंपास करतात. तर शोभा ही कुख्यात गुन्हेगार गझणीची आई आहे.