भारतीय संघ मलेशियाकडून पराभूत

सुदीरमन कप बॅडमिंटन : पुढील सामन्यात चीनविरुद्ध विजय आवश्यक

नानिंग : भारताला सुदीरमन मिश्र टीम चॅम्पियनशिपच्या ‘ड’ गटातील सामन्यात मलेशियाने ३-२ ने पराभूत केले. या निकालामुळे भारताच्या बाद फेरी गाठण्याच्या आशा धुसर झाल्या आहेत.

सात्विक साईराज रांकीरेड्डी व अश्विनी पोनप्पाने शानदार कामगिरी करीत मलेशियाच्या गोह सूप हुआत व लाई शेवोन जेमी यांचा १६-२१, २१-१७, २४-२२ ने पराभव करीत भारताला १-० ने आघाडी मिळवून दिली. त्यानंतर पुरुष एकेरीत किदाम्बी श्रीकांतच्या स्थानी समीर वर्माला खेळविण्याचा भारताचा निर्णय चुकीचा ठरला. वर्माला ली जी जियाने ४८ मिनिटांमध्ये २१-१३, २१-१५ ने पराभूत केले.

आॅलिम्पिक व विश्व चॅम्पियनशिपची रौप्य पदक विजेती पी.व्ही. सिंधूने गोह जिन वेईला ३५ मिनिटांमध्ये २१-१२, २१-८ ने पराभूत केले. त्यानंतर दुहेरीत मनू अत्री व बी. सुमित रेड्डी यांना आरोन चिया व टियो ई यी यांच्याविरुद्ध २२-२०, २१-१९ ने पराभव स्वीकारावा लागला.

त्यानंतर अश्विनी पुन्हा एकदा मैदानात उतरली आणि एन. सिक्की रेड्डीच्या साथीने महिला दुहेरीत अंतिम फेरीत खेळली. मात्र त्यांना जागतिक क्रमवारीतील १३ व्या क्रमांकाची जोडी चोऊ मेई कुआन व ली मेंग यिआन यांच्याविरुद्ध २१-११, २१-१९ ने पराभव स्वीकारावा लागला.

भारतीय संघाला यानंतरच्या लढतीत बुधवारी चीनविरुद्ध खेळावे लागले. हा सामन गमावल्यास भारताचे आव्हान संपुष्टात येईल. चीन संघात आॅल इंग्लंड चॅम्पियन चेन युफेई व जागतिक क्रमवारीतील दुसऱ्या क्रमांकाची खेळाडू शि युकी यांचा समावेश आहे. भारतीय संघाने २०११ व २०१७ मध्ये या स्पर्धेत उपांत्यपूर्व फेरी गाठली होती. (वृत्तसंस्था)