अकोला जिल्ह्यातील सेतू केंद्र बंद; कामकाज प्रभावित!

विविध मागण्यांसाठी जिल्ह्यातील महा ई-सेवा केंद्र (सेतू केंद्र) शुक्रवारी बंद ठेवण्यात आले. त्यामुळे सेतू केंद्रांमार्फत होणारे कामकाज प्रभावित झाल्याने, विविध कामांसाठी नागरिकांना नाहक हेलपाटे सहन करावे लागले.

ठळक मुद्देनागरिकांना सहन करावे लागले हेलपाटे

लोकमत न्यूज नेटवर्क
अकोला : विविध मागण्यांसाठी जिल्ह्यातील महा ई-सेवा केंद्र (सेतू केंद्र) शुक्रवारी बंद ठेवण्यात आले. त्यामुळे सेतू केंद्रांमार्फत होणारे कामकाज प्रभावित झाल्याने, विविध कामांसाठी नागरिकांना नाहक हेलपाटे सहन करावे लागले.

ज्या गावांमध्ये महा ई-सेवा केंद्र सक्षमरीत्या नागरिकांना सेवा देऊन उदरनिर्वाह करीत आहेत, अशा गावांमध्ये अतिरिक्त सीएससी केंद्र देण्यात येऊ नये, शहरी भागात सीएससी केंद्र मंजूर करताना एक किलोमीटर अंतराची र्मयादा ठेवण्यात यावी, महा ई-सेवा केंद्रांमार्फत दिल्या जाणार्‍या विविध शासकीय व निमशासकीय सेवांसाठी देण्यात येणार्‍या कमिशनमध्ये वाढ करण्यात यावी, संग्राम केंद्राच्या धर्तीवर मानधन, संगणक, प्रिंटर, वीज, स्टेशनरी व सरकारी गाळे, असा लाभ देण्यात यावा, महा ई-सेवा केंद्र चालकांना कमी व्याज दरावर कर्ज देण्यात यावे, डिजिटल ७/१२ व ८-अ चा अद्ययावत डेटा महा ई-सेवा केंद्रांमार्फत नागरिकांना देण्यासाठी प्रशासनाने सहकार्य करावे  इत्यादी मागण्यांसाठी राज्यातील महा ई-सेवा केंद्र चालकांनी पुकारलेल्या एक दिवसीय बंदला पाठिंबा म्हणून अकोला जिल्ह्यातील महा ई-सेवा केंद्र चालकांनी २४ नोव्हेंबर रोजी महा ई-सेवा केंद्र बंद ठेवले. दिवसभर सेतू केंद्र बंद राहिल्याने सेतू केंद्रामार्फत होणारे कामकाज प्रभावित झाले. त्यामुळे सेतू केंद्रांमार्फत होणार्‍या कामांसाठी नागरिकांना नाहक हेलपाटे सहन करावे लागले.