देवराईमध्ये बस आणि दुचाकीचा भीषण अपघात, दोघांचा मृत्यू 

पाथर्डी तालुक्यातील देवराई गावाजवळ बुधवारी सकाळी सहा वाजता बस व दुचाकीचा भीषण अपघात झाला आहे.

पाथर्डी - पाथर्डी तालुक्यातील देवराई गावाजवळ बुधवारी (5 सप्टेंबर) सकाळी सहा वाजता बस व दुचाकीचा भीषण अपघात झाला आहे. या अपघातात दुचाकीवरील पती-पत्नींचा जागीच मृत्यू झाला. अपघातानंतर संतप्त नागरिकांनी महामार्ग विकसित करणाऱ्या ठेकेदार आर.बी.के कंपनी विरुद्ध गुन्हा दाखल करावा या मागणीसाठी सकाळी सहापासून रास्तारोको सुरु केला आहे. 

देवराई गावाजवळ नगरकडून पाथर्डीकडे जाणारी बस व पाथर्डीहून नगरला जात असलेल्या मोटारसायकलची समोरासमोर धडक झाली. या अपघातात मोटारसायकलवरील राहुल महादेव राठोड (28) आणि मनिषा राहुल राठोड (25) यांचा जागीच मृत्यू झाला. अपघातानंतर परिसरातील नागरिकांनी मोठी गर्दी केल्यामुळे महामार्गावर वाहतूक कोंडी झाली. संतप्त नागरिकांनी अॅड.सतीश पालवे यांच्या नेतृत्वाखाली  महामार्गाच्या ठेकेदारावर गुन्हा दाखल करावा अशी मागणी करत रास्तारोको सुरु केला. यामुळे महामार्गाच्या दुतर्फा एक किलोमीटर परिसरात वाहनांच्या रांगा लागल्या होत्या. घटनेची माहिती मिळताच पोलीस निरीक्षक रमेश रत्नपारखी यांनी सहकाऱ्यांसह घटनास्थळी धाव घेत वाहतूक पूर्ववत करून देण्यासाठी आंदोलकांशी बोलणी सुरु केली आहे.