धक्कादायक : पालकमंत्री राम शिंदे यांच्या गावात सापडला मुलीचा मृतदेह, चौंडीमध्ये खळबळ

अहमदनगर जिल्ह्यातील जामखेड तालुक्यातील चौंडी येथे धक्कादायक प्रकार गुरुवारी सकाळी उघडकीस आला आहे. एका अल्पवयीन मुलीचा मृतदेह कुजलेल्या अवस्थेत आढळून आला.

अहमदनगर : अहमदनगर जिल्ह्यातील जामखेड तालुक्यातील चौंडी येथे धक्कादायक प्रकार गुरुवारी सकाळी उघडकीस आला आहे. एका अल्पवयीन मुलीचा मृतदेह कुजलेल्या अवस्थेत आढळून आला. आरती पांडुरंग सायगुडे(वय-१७) असे मृत मुलीचे नाव आहे. मृतदेह जळालेल्या अवस्थेत आहे. पोलीस तात्काळ घटनास्थळी पोहोचले असून तपासाची चक्रे वेगाने फिरत आहेत. जलसंधारण मंत्री व अहमदनगर जिल्ह्याचे पालकमंत्री राम शिंदे यांचे हे गाव आहे.
आरती चापडगाव येथील महाविद्यालयात शिकत होती. तेथूनच ती आठ दिवसांपासून बेपत्ता होती. त्यानंतर गुरूवारी सकाळी तिचा मृतदेह तलाव परिसरात आढळून आला आहे. मृतदेह जळालेल्या अवस्थेत असून तो कुजलेला असल्याचे पोलिसांनी सांगितले. ही घटना चार दिवसांपुर्वी घडली असून आज ती उघडकीस आल्याचे पोलिसांचे म्हणणे आहे. मुलीचा मृत्यू ही आत्महत्या की घातपात याबाबत संशय व्यक्त केला जात आहे. दरम्यान पोलिसांना माहिती दिल्यानंतरही ते वेळेवर घटनास्थळी पोहोचले नाही, असे गावक-यांचे म्हणणे आहे. स्थानिक गुन्हे शाखेचे पोलिस पथक घटनास्थळी पोहोचले असून तपास वेगाने सुरु आहे.