यवतमाळ : विदर्भ आणि कर्नाटकच्या सीमेवर कमी दाबाचा पट्टा तयार झाला आहे. यामुळे हवामान विभागाने ६ मेपर्यंत यलो अलर्ट जाहीर केला आहे. त्यात ४ मेपर्यंत जिल्ह्यात वादळवाऱ्यासह पावसाचा अंदाज आहे. पुढील दोन दिवस रिमझिम पावसाची शक्यता वर्तविण्यात आली आहे.
गत सात दिवसांपासून जिल्ह्यात पावसाचा धुमाकूळ सुरू आहे. प्रारंभी २ मेपर्यंत वर्तविलेला पावसाचा अंदाज हवामान विभागाने आणखी ६ मेपर्यंत वर्तविला आहे. विदर्भ आणि कर्नाटकच्या सीमेवर कमी दाबाचा पट्टा तयार झाल्याने जिल्ह्यासह विदर्भाला यलो अलर्ट जाहीर करण्यात आला आहे. यात ३ आणि ४ तारखेला मोठ्या पावसाचा अंदाज वर्तविण्यात आला आहे.
३५ घरांची अंशत: पडझड
यवतमाळ जिल्ह्यात वादळवाऱ्यासह आलेल्या पावसाने एक जनावर ठार झाले, तर ३५ घरांची अंशत: पडझड झाली. २३ हेक्टरचे नुकसान झाले. यात मारेगावमध्ये ११, केळापूर १०, राळेगावमध्ये २ हेक्टरचे नुकसान झाले. सततच्या पावसाने नुकसानीचा आकडा वाढणार आहे.