मासिक सभा निश्चितीसाठी सीओंच्या सवडीची प्रतीक्षा

नगरपंचायतीच्या नगराध्यक्ष आणि विषय समितीच्या सभापती निवडीनंतर पहिल्या मासिक सभेची सर्वांनाच उत्सुकता लागली आहे.

महागाव नगरपंचायत : पहिल्या सभेची सर्वांनाच उत्सुकता, अतिरिक्त प्रभाराचा फटका
महागाव : नगरपंचायतीच्या नगराध्यक्ष आणि विषय समितीच्या सभापती निवडीनंतर पहिल्या मासिक सभेची सर्वांनाच उत्सुकता लागली आहे. परंतु येथे कायमस्वरूपी मुख्याधिकारी नसल्याने मासिक सभेच्या निश्चितीसाठी त्यांच्या सवडीची प्रतीक्षा लागली आहे.
महागाव नगरपंचायतीच्या मुख्याधिकाऱ्यांचा प्रभार उमरखेड नगरपरिषदेचे मुख्याधिकारी प्रवीण मानकर यांच्याकडे देण्यात आला आहे. उमरखेड नगरपरिषदेच्या कामाचा आवाका मोठा आहे. २३ नगरसेवक अन्य पदाधिकाऱ्यांचा मोठा जनसंपर्क ठेवावा लागतो. २५ कोटींच्या जवळपास उमरखेड नगरपरिषदेची कामे सुरू आहे. या कामांच्या तुलनेत कोर्ट केसेसही सांभाळाव्या लागत असल्याने मानकर यांना फुरसद मिळत नाही. त्यातच आता महागाव नगरपंचायतीचा अतिरिक्त पदभार त्यांना देण्यात आला आहे. परिणामी महागावकडे यायला त्यांना वेळच मिळत नाही. महागाव नगरपंचायतीचा नव्यानेच संसार सुरू झाला आहे. सारेच नवखे असल्याने अनेक कामांची मोठी उत्सुकता लागली आहे. काम होत नाही म्हणून कोणी नगरसेवक कार्यालयात आला तरी मुख्याधिकारी आले नाही म्हटले की त्याला परत जावे लागते.
नगराध्यक्ष आणि उपाध्यक्षांची निवड होवून दोन आठवड्यांचा कालावधी उलटला. त्यांनाही आपल्या कामाची उत्सुकता लागली आहे. मुख्याधिकारी नसल्याने मासिक सभा आणि नव्या, जुन्या कामांचे नियोजन थांबले आहे. सर्वच प्रभागात काही अपवाद वगळता नगरसेवक आपल्या स्वत:जवळील पैसे खर्च करून स्वच्छता मोहीम, नाल्या सफाई, वृक्षलागवड आदी कामे घेत आहे. परंतु ठोस कामासाठी नियोजन आणि तरतूद करून प्रत्यक्ष काम करण्यासाठी मासिक सभेची मंजुरी आवश्यक आहे. त्यातच अनेकांना नाहरकत प्रमाणपत्र तसेच इतर कामेही अडकली आहे. महागाव शहराला पाणीटंचाईचा फटका बसत आहे. पाणीपुरवठा यंत्रणा ठप्प झाली आहे. २० हजार नागरिक आजही नागरी सुविधांपासून वंचित आहे. रोज एक लाख लिटर पाण्याची गरज भासत असूनही येथील पाणीपुरवठा करणारी यंत्रणा बंद आहे. शहरात जलशुद्धीकरण योजना कार्यान्वित करण्यात आली असून निकृष्ट कामामुळे ती सुरूच झाली नाही. त्यामुळे शहरातील नागरिकांना गढूळ पाणी प्यावे लागत आहे. स्वच्छता, आरोग्य, शिक्षण आदी प्रश्न निर्माण झाले आहे. सदर प्रश्न सोडविण्यासाठी नगराध्यक्षासह उपाध्यक्ष उदय नरवाडे, शैलेश कोपरकर, राजू राठोड, छाया वाघमारे, फिरोजाबी पठाण, आशा भरवाडे, बाळू कदम, मंदा महाजन, जयश्री नरवाडे, अरुणा चवरे, सीमा नरवाडे, नारायण शिरबिडे, संतोष गंधारे, सरस्वती राजनकर, हिना सुरैया, विनोद कोपरकर या नगरसेवकांना शहराच्या सर्वांगीण विकासाचे वेध लागले आहे. मात्र मुख्याधिकारी नसल्याने सर्वांचा नाईलाज होत आहे.
(शहर प्रतिनिधी)