टिपेश्वर अभयारण्यात पायात फास अडकलेला वाघ मरणाच्या दारात

गेल्या काही दिवसांपासून उजव्या पायात फास अडकल्याने टिपेश्वर अभयारण्यातील एक वाघ मरणाच्या दारात उभा आहे. त्याची प्रकृती अत्यंत गंभीर बनली असून त्यामुळे वनविभाग चिंतेत आहे.

ठळक मुद्देशिकाऱ्यांनी फास लावल्याची शंका

लोकमत न्यूज नेटवर्कयवतमाळ : गेल्या काही दिवसांपासून उजव्या पायात फास अडकल्याने टिपेश्वर अभयारण्यातील एक वाघ मरणाच्या दारात उभा आहे. त्याची प्रकृती अत्यंत गंभीर बनली असून त्यामुळे वनविभाग चिंतेत आहे. विशेष म्हणजे या वाघाला कॉलर आयडी बसविली आहे. दिवसेंदिवस या वाघाची प्रकृती ढासळत असून त्याला वाचविण्यासाठी वनविभागाची धावपळ सुरू आहे.बुधवारी सकाळी ८.४५ वाजता टिपेश्वर अभयारण्यात सफारीसाठी आलेले भट्टू नामक पर्यटक गाईड सलमान बरकत खान यांच्यासोबत अभयारण्यात फिरत असताना कक्ष क्रमांक १०० मध्ये पिलखान नाल्याच्या वरच्या बाजुला एक वाघ दिसला. पर्यटकांनी त्याचे छायाचित्र घेतले असता, सदर वाघाच्या उजव्या पायाच्या पंजाच्यावर दोरीचा फास अडकून जखम झाल्याचे निदर्शनास आले. दुसºया वाहनातील पुणे येथील पर्यटक आदित्य क्षीरसागर व त्यांचे गाईड राजेंद्र चुकाबोतलावार यांनीसुद्धा या बाबीला पुष्टी दिली. माहिती मिळताच विभागीय वनअधिकारी (वन्यजीव) डॉ.केतन पातोंड हे वनविभागाच्या अधिकाऱ्यांसमवेत पिलखान नाल्याजवळ पोहोचले. अँटेनाद्वारे लोकेशन घेतले असता, वाघ नाल्याच्या गवताच्या दिशेने असल्याचे दिसून आले. त्याठिकाणी निरीक्षण केले असता, सदर वाघाने डरकाळी फोडली व तो तेथून निघून गेला. त्यामुळे त्याचे छायाचित्र मिळू शकले नाही.टिपेश्वर अभयारण्यात टी-वन वाघिणीचे तीन बछडे होते. हे बछडे आता वयाने मोठे झाले आहेत. या तीनपैकी दोन वाघांना काही महिन्यांपूर्वी दिल्लीच्या एका चमूने कॉलर आयडी बसविली होती. या अभयारण्यात शिकारीसाठी फास लावले जात असल्याची चर्चा असून त्यातूनच ही घटना समोर आल्याचे बोलले जाते. गंभीर बाब ही की, तीन वाघांपैकी एकाच्या गळ्यात काही महिन्यांपूर्वी फास अडकला होता. आता दुसºयाच्या पायात फास अडकल्याने चिंता व्यक्त केली जात आहे. सदर फास हा काहींच्या मते नायलॉन दोरीचा, तर काहींच्या मते तारांपासून तयार केलेला आहे. दिवसेंदिवस वाघाच्या पायाची जखम चिघळत असून त्यामुळे वाघाची प्रकृतीही ढासळत चालली आहे.टिपेश्वर अभयारण्यात ८ मार्च, १५ मार्च व २९ एप्रिल रोजी क्षेत्रीय कर्मचाऱ्यांकडून गस्त करण्यात आली. त्यावेळी अभयारण्य क्षेत्रात तसेच सिमेवरील क्षेत्रात कुठेही फासे आढळले नसल्याचे वनविभागाने स्पष्ट केले आहे. मात्र ७ मे रोजी वनविभागाच्या अधिकाऱ्यांना गस्तीदरम्यान कक्ष क्रमांक एकमध्ये शंभू नाल्यात चार-पाच ठिकाणी शिकारीसाठी दोरीचे फास लावल्याचे निदर्शनास आले होते. त्यानंतर गस्ती करणाऱ्या चमूने ते फास ताब्यात घेतले. कोबई, कोपामांडवी व अंधारवाडी या गावांमध्ये फासे लावणाऱ्या आरोपींचा शोध घेतला जात असून आरोपी सापडल्यास त्यांच्याविरूद्ध कडक कारवाई करण्यात येईल, असे वनविभागाच्यावतीने सांगण्यात आले. जखमी असलेल्या वाघाला बेशुद्ध करून त्याच्यावर उपचार करण्यासाठी क्षेत्रीय स्तरावर आवश्यक कारवाई सुरू करण्यात आली असल्याचे विभागीय वनअधिकारी प्रमोद पंचभाई यांनी ‘लोकमत’ला सांगितले.टिपेश्वर अभयारण्यात एका वाघाच्या उजव्या पायात फास अडकला असून त्याची जखम गंभीर स्वरूपाची आहे. यासंदर्भात माहिती घेणे सुरू असून सदर वाघाच्या पायातील फास काढण्यासाठी आमचे प्रयत्न सुरू आहेत.- प्रमोद पंचभाई, उपवनसंरक्षक (वन्यजीव) पांढरकवडा