तस्करांच्या हल्ल्यात तीन वन कर्मचारी गंभीर

मराठवाड्यातील सागवान तस्करांनी वन कर्मचाऱ्यांवर हल्ला केल्याची घटना पैनगंगा अभयारण्यातील खरबी वर्तुळात

 उमरखेड : मराठवाड्यातील सागवान तस्करांनी वन कर्मचाऱ्यांवर हल्ला केल्याची घटना पैनगंगा अभयारण्यातील खरबी वर्तुळात सोमवारी सायंकाळी ६ वाजताच्या सुमारास घडली. यात तीन वन कर्मचारी जखमी झाले असून एका सागवान तस्कराला अटक करण्यात आली. तर पाच जण पसार झाले आहे.
पैनगंगा अभयारण्यातील खरबी जंगलात सागवान तस्कर शिरल्याची माहिती खरबी वनपरिक्षेत्र अधिकारी संदेश पाटील यांना मिळाली. त्यावरुन वन विभागाचे पथक आणि एसटीपीएफचे जवान जंगलात रवाना झाले. सायंकाळी ६ वाजता कक्ष क्र. ६०३ मध्ये सहा जण सागवान वृक्षाची कटाई करीत असल्याचे लक्षात आले. वन विभागाच्या कर्मचाऱ्यांनी या तस्करांना पकडण्याचा प्रयत्न केला. त्यावेळी तुफान हाणामारी झाली. यात आर.एल. यादव, महेश ठणके, गौतम साळवे हे वन कर्मचारी जखमी झाले. ही परिस्थिती वन कर्मचाऱ्यांनी तस्करांचा पाठलाग केला. त्यावेळी तस्कर शेख अल्लाउद्दीन शेख उस्मान (४६) रा. किनवट हा तावडीत सापडला. तर इतर पाच जण अंधाराचा फायदा घेत किनवट शहराकडे पसार झाले. यानंतर शेख अल्लाउद्दीनने दिलेल्या माहितीवरून त्याच्यासह शेख साहब जैनुद्दीन, शेख समू शेख मिज, शेख फिर्दोस शेख रतन, संतोष गड्डमवार, शेख मोहंमद शेख महबूब या सहा जणांविरुद्ध गुन्हा दाखल केला. शेख अल्लाउद्दीनची पाच दिवसाची वन कोठडी घेण्यात आली आहे. वर्षभरापूर्वी खरबी बीटमध्ये वन कर्मचाऱ्यावर हल्ल्याच्या तीन घटना घडल्या होत्या. (शहर प्रतिनिधी)