Maharashtra Election 2019; परप्रांतीय २० हजार पोलीस, होमगार्ड तैनात

महाराष्ट्रातील २८८ विधानसभा मतदारसंघात २१ ऑक्टोबर रोजी होऊ घातलेल्या मतदानाच्या अनुषंगाने परप्रांतातून २० हजार पोलीस व होमगार्ड बोलविण्यात आले आहेत.

ठळक मुद्दे आठ कोटी ७७ लाखांचा खर्च

लोकमत न्यूज नेटवर्कयवतमाळ : महाराष्ट्रातील २८८ विधानसभा मतदारसंघात २१ ऑक्टोबर रोजी होऊ घातलेल्या मतदानाच्या अनुषंगाने परप्रांतातून २० हजार पोलीस व होमगार्ड बोलविण्यात आले आहे. राज्यातील विविध मतदारसंघात हे अतिरिक्त मनुष्यबळ स्थानिक पोलिसांच्या दिमतीला तैनात केले जाणार आहे.राज्यातील विधानसभा निवडणुकीसाठी महाराष्ट्राला लागून असलेल्या गुजरात, कर्नाटक, मध्यप्रदेश व तेलंगणा या चार राज्यातून पोलीस कुमक मागण्यात आली आहे. परप्रांतातून येणाऱ्या पोलीस व होमगार्ड जवानांचा हा आकडा सुमारे २० हजार एवढा आहे. राज्यभर त्यांची नेमणूक होणार आहे. त्यांच्या भोजन, निवास, प्रवास व अन्य भत्त्यांवर एकूण आठ कोटी ७७ लाख नऊ हजार ७०० रुपये खर्च होणार आहे. या खर्चाला १६ ऑक्टोबर रोजी राज्याच्या गृहविभागाने मान्यता दिली असून तसा आदेशही जारी केला आहे. त्या-त्या राज्यातील आकारणीनुसार या २० हजार पोलीस कर्मचाऱ्यांना भत्ते दिले जाणार आहे.