यवतमाळ : ‘लोकमत’चे संस्थापक संपादक तथा ज्येष्ठ स्वातंत्र्यसंग्राम सेनानी जवाहरलाल दर्डा उपाख्य बाबूजी यांच्या जन्मशताब्दी दिनानिमित्त १० ते १२ फेब्रुवारी या कालावधीत तीन दिवसीय ‘स्वर जवाहर’ संगीत महोत्सवाचे आयोजन करण्यात आले आहे. अमोलकचंद महाविद्यालय, जवाहरलाल दर्डा अभियांत्रिकी व तंत्रशास्त्र संस्था आणि जवाहरलाल दर्डा इंग्लिश मीडियम स्कूल, यवतमाळ यांच्या संयुक्त विद्यमाने येथील गोधनी रोडवरील अँग्लो हिंदी हायस्कूलच्या प्रांगणात सायंकाळी साडेसहा वाजता हा महोत्सव रंगणार आहे. आज, शुक्रवारी प्रसिद्ध शास्त्रीय गायिका कौशिकी चक्रवर्ती यांच्या ‘अनुभूती’ या फ्यूजन काॅन्सर्टने महोत्सवाला प्रारंभ होणार आहे. शनिवारी (दि.११) प्रसिद्ध सिनेपार्श्वगायिका साधना सरगम यांची लाइव्ह इन काॅन्सर्ट ही लोकप्रिय गाण्यावरील मैफल रंगणार आहे तर तिसऱ्या दिवशी रविवारी (दि.१२) जागतिक स्तरावर स्वत:ची वेगळी ओळख निर्माण केलेले प्रसिद्ध सतारवादक नीलाद्री कुमार यांचा ट्रॅडिशन मिट्स इनोव्हेशन हा कार्यक्रम होणार आहे. महोत्सवाची जय्यत तयारी झाली असून सुमारे ४० हजार चौरस फूट क्षेत्रफळाच्या पटांगणावर पाच हजार खुर्च्यांची आसन व्यवस्था करण्यात आली आहे. संगीत रसिकांनी या तीनदिवसीय महोत्सवाचा लाभ घेण्याचे आवाहन संयोजकांच्या वतीने करण्यात आले आहे.
यवतमाळमध्ये आजपासून ‘स्वर जवाहर’ महोत्सव; स्वातंत्र्यसंग्राम सेनानी जवाहरलाल दर्डा जन्मशताब्दीनिमित्त आयोजन
By ऑनलाइन लोकमत | Published: February 10, 2023 9:55 AM