पांढरकवडा (यवतमाळ) : घरगुती वादातून मुलाने रागाच्या भरात आपल्या जन्मदात्या वडिलांच्या दोन्ही पायांवर फावड्याच्या दांड्याने मारून गंभीर जखमी केले. यवतमाळ येथील शासकीय रुग्णालयात उपचार सुरू असताना वडिलांचा मृत्यू झाला. याप्रकरणी पोलिसांनी रविवारी आरोपी मुलाविरूद्ध खुनाचा गुन्हा दाखल केला आहे.
ही दुर्दैवी घटना पांढरकवडा शहरात २२ मे रोजी सकाळी ८:०० वाजताच्या सुमारास शहरातील शिंदे यांच्या दुकानासमोर घडली. चक्रधर वैकुंठ भगत (५२, रा. पांढरकवडा) असे मृत वडिलांचे नाव, तर पंकज उर्फ गुड्ड्या चक्रधर भगत (२६, रा. पांढरकवडा) असे आरोपी मुलाचे नाव आहे. या घटनेने पांढरकवडा शहरात एकच खळबळ उडाली आहे.
२२ मे रोजी सकाळी ८:०० वाजताच्या सुमारास पांढरकवडा शहरातील शिंदे यांच्या दुकानासमोर चक्रधर वैकुंठ भगत यांच्यासोबत त्यांचा मुलगा पंकज भगत याने वाद घातला. या वादात पंकजने त्याच्या हातातील लाकडी फावड्याच्या दांड्याने वडिलांच्या डाव्या पायावर मारून त्यांना जखमी केले. यात एकाने भांडण सोडविण्याचा प्रयत्न केला असता, मुलाने त्याच्या वडिलांना धक्काबुक्की केली. त्यामुळे वडील खाली कोसळले. त्यात त्यांच्या उजव्या पायाला जबर दुखापत झाली.
या घटनेनंतर मुलगा तेथून निघून गेला. दरम्यान, गंभीर अवस्थेत घटनास्थळी पडून असलेल्या चक्रधर भगत यांना काहींनी पांढरकवडा येथील उपजिल्हा रुग्णालयात उपचारासाठी दाखल केले. तेथे प्राथमिक उपचार करून पुढील उपचारासाठी त्यांना यवतमाळ येथील जिल्हा रुग्णालयात दाखल करण्यात आले होते. मात्र, २७ मे रोजी चक्रधर भगत यांचा मृत्यू झाला. याप्रकरणी स्वत: ठाणेदार जगदीश मंडलवार यांनी तक्रार दाखल केली. त्यावरून आरोपी पंकज उर्फ गुड्ड्या भगत याच्याविरूद्ध भादंवि ३०२ अन्वये गुन्हा दाखल करून अटक केली. या घटनेचा तपास पोलिस निरीक्षक जगदीश मंडलवार यांच्या मार्गदर्शनात सहायक पोलिस निरीक्षक प्रवीण लिंगाडे करीत आहेत.