रस्ता कंपनीला ३९ लाखांचा दंड

दारव्हा-कुपटा राज्य मार्गासाठी कुंभारकिन्ही प्रकल्प क्षेत्रातून रस्ता बांधकाम कंपनीने अंदाजे एक हजार ब्रास अतिरिक्त गौण खनिज उत्खनन केले. त्याची वाहतूक केल्याचे निदर्शनास आले. यानंतर ही कारवाई करण्यात आली. या नोटीसमुळे कंपनीचे धाबे दणाणले. ‘ईगल इन्फ्रास्ट्रक्चर प्रायव्हेट लिमिटेड’ या कंपनीकडून दारव्हा-कुपटा मार्गाचे रुंदीकरण, मजबुतीकरण, डांबरीकरण सुरू आहे.

ठळक मुद्देतहसीलदारांची नोटीस : ईगल इन्फ्रास्ट्रक्चरला दणका, अवैध गौण खनिज उत्खनन

लोकमत न्यूज नेटवर्क
दारव्हा : रस्त्याच्या कामासाठी अनधिकृत गौण खनिज उत्खनन केल्याप्रकरणी ईगल इन्स्फ्रास्ट्रक्चर या रस्ता बांधकाम कंपनीला तहसीलदार संजय जाधव यांनी ३९ लाखांच्या दंडाची नोटीस बजावली. यामुळे रस्ता बांधकाम कंपनीचे धाबे दणाणले.
दारव्हा-कुपटा राज्य मार्गासाठी कुंभारकिन्ही प्रकल्प क्षेत्रातून रस्ता बांधकाम कंपनीने अंदाजे एक हजार ब्रास अतिरिक्त गौण खनिज उत्खनन केले. त्याची वाहतूक केल्याचे निदर्शनास आले. यानंतर ही कारवाई करण्यात आली. या नोटीसमुळे कंपनीचे धाबे दणाणले. ‘ईगल इन्फ्रास्ट्रक्चर प्रायव्हेट लिमिटेड’ या कंपनीकडून दारव्हा-कुपटा मार्गाचे रुंदीकरण, मजबुतीकरण, डांबरीकरण सुरू आहे. या कामाकरिता कंपनीने उपविभागीय अधिकाऱ्यांकडून कुंभारकिन्ही प्रकल्प क्षेत्रातून एक हजार ब्रास गौण खनिज उत्खननाची परवानगी घेतली. प्रत्यक्षात त्यापेक्षा जास्त उत्खनन होत असल्याची माहिती तहसीलदार संजय जाधव यांना मिळाली. त्यांच्या सूचनेवरून मंडळ अधिकारी व तलाठ्यांनी पंचनामा करून अहवाल सादर केला.
अहवालात त्या ठिकाणाहून परवानगीपेक्षा अंदाजे एक हजार ब्रास जादा गौण खनिजाचे उत्खनन करून चोरट्या मार्गाने त्याची विल्हेवाट लावल्याचे नमूद केले. विनापरवाना गौण खनिज उत्खनन करून चोर्या मार्गाने विल्हेवाट लावणे हा महाराष्ट्र जमीन महसूल अधिनियम १९६६ चे कलम ४८ व पोट कलम ८ (१) ( २) तसेच महाराष्ट्र शासन राजपत्र असाधारण भाग चार ‘ब’मधील परिच्छेद ८, ९ आणि ९.२ मधील तरतुदीनुसार दंडास पात्र गुन्हा आहे. त्यामुळे तहसीलदारांनी कंपनीला ३९ लाख रुपये दंड का लावू नये, याबाबत नोटीस दिली. या नोटीसमध्ये २४ तासात हजर होऊन खुलासा करण्याचे निर्देश आहे. आता कंपनीवर काय कारवाई होते, याकडे सर्वांचे लक्ष लागले आहे. केवळ नोटीस देऊनच प्रशासनाने गप्प राहू नये, अशी अपेक्षा व्यक्त होत आहे.

पहिलीच मोठी कारवाई
अवैध गौण खनिज उत्खननाची ही आत्तापर्यंतची तालुक्यातील सर्वात मोठी कारवाई असल्याचे बोलले जाते. तहसीलदार संजय जाधव यांनी माहिती मिळताच पाहणी केली. तातडीने पंचनामा करण्याचे आदेश दिले. त्यामुळे हा प्रकार उघडकीस आला. पंचनाम्यात एक हजार ब्रास जादा गौण खनिज उत्खनन करण्यात आल्याचे नमूद आहे. मात्र प्रत्यक्षात त्यापेक्षाही मोठ्या प्रमाणात खोदकाम झाल्याचे सागितले जाते. परिणामी हा अवैध गौण खनिज उत्खननाचा आकडा वाढण्याची शक्यता आहे. त्यामुळे या प्रकरणात महसूल प्रशासन पुढे काय भूमिका घेते, यावरच दंडाची रक्कम ठरणार आहे.