जिल्हा परिषद अध्यक्षपद पुन्हा राष्ट्रवादीकडे

गत अडीच वर्षांपासून सेना-भाजपाशी असलेला घरोबा तोडत राष्ट्रवादीने जिल्हा परिषदेत काँग्रेसशी आघाडी केली आणि पुन्हा अध्यक्षपद आपल्या पदरी पाडून घेतले. बेलोरा बु. गटाच्या सदस्य डॉ. आरती

आरती फुफाटेंची वर्णी : उपाध्यक्षपदी काँग्रेसचे मांगुळकर
यवतमाळ : गत अडीच वर्षांपासून सेना-भाजपाशी असलेला घरोबा तोडत राष्ट्रवादीने जिल्हा परिषदेत काँग्रेसशी आघाडी केली आणि पुन्हा अध्यक्षपद आपल्या पदरी पाडून घेतले. बेलोरा बु. गटाच्या सदस्य डॉ. आरती फुफाटे यांची अध्यक्षपदी तर उपाध्यक्षपदी काँग्रेसचे बाळासाहेब मांगुळकर यांची निवड करण्यात आली. त्यांच्या विरोधात सेना-भाजपाने आपला उमेदवार उभा केला होता. मात्र मताधिक्याने राष्ट्रवादी-काँग्रेस आघाडीचे उमेदवार विजयी झाले.
जिल्हा परिषदेत रविवारी अध्यक्ष आणि उपाध्यक्ष पदासाठी निवडणूक झाली. अध्यक्ष पदासाठी राष्ट्रवादीच्या डॉ. आरती फुफाटे यांनी तर उपाध्यक्षपदासाठी काँग्रेसचे बाळासाहेब मांगुळकर यांनी आपले अर्ज दाखल केले. त्यांच्या विरोधात शिवसेनेच्या मंदा गाडेकर यांनी अध्यक्षपदासाठी तर उपाध्यक्ष पदासाठी भाजपाचे अमन गावंडे यांनी नामांकन दाखल केले. निवडणूक होऊन डॉ. फुफाटे आणि मांगुळकर यांना प्रत्येकी ४४ मते मिळाली. तर सेनेच्या मंदा गाडेकर आणि भाजपाचे गावंडे यांना प्रत्येकी १८ मते मिळाली. काँग्रेस २२, राष्ट्रवादी २१, शिवसेना १३, भाजपा चार, मनसे एक आणि अपक्ष एक असे संख्याबळ आहे. (कार्यालय प्रतिनिधी)