यवतमाळात कोरोना बाधितांचा आकडा ३४

लोकमत न्यूज नेटवर्क यवतमाळ : शहरात कोरोनाबाधितांचा आकडा दिवसेंदिवस वाढत आहे. शनिवारी एकाच दिवशी नव्याने २० रुग्णांचे अहवाल पॉझिटिव्ह ...

ठळक मुद्देनव्या २० जणांची भर । एकूण रुग्ण ४६

लोकमत न्यूज नेटवर्क
यवतमाळ : शहरात कोरोनाबाधितांचा आकडा दिवसेंदिवस वाढत आहे. शनिवारी एकाच दिवशी नव्याने २० रुग्णांचे अहवाल पॉझिटिव्ह आले. यामुळे शासकीय यंत्रणा चांगलीच हादरली आहे.
यवतमाळात सध्या उपचार घेत असलेल्या पॉझिटिव्ह रुग्णाचा आकडा ३४ वर पोहोचला आहे. आतापर्यंत यवतमाळात ४६ नागरिक कोरोना पॉझिटिव्ह आढळले आहे. विशिष्ट भागात कोरोनाचा उद्रेक झाला आहे. यामुळे या भागातील संपूर्ण परिस्थिती नियंत्रणात आणण्यासाठी येथील नागरिकांना होम क्वारंटाईन करण्याची प्रक्रिया शनिवारी पार पडली. या भागातील नागरिकांच्या हातावर होम क्वारंटाईनचा शिक्का मारण्यात आला आहे. या भागातील लोक बाहेर पडू नये, बाहेर पडले तरी ते तत्काळ लक्षात यावे यासाठी जिल्हा प्रशासनाकडून ही उपाययोजना हाती घेण्यात आली आहे. या भागातील इत्यंभूत माहिती मिळावी यासाठी वायरलेस यंत्रणा उभारण्यात आली आहे. नागरिकांना सोशल डिस्टन्स पाळण्याच्या सूचना पोलीस विभाग वारंवार देत आहे. जिल्हाधिकारी, पोलीस अधीक्षक, जिल्हा शल्य चिकित्सक आणि आरोग्य विभागाच्या यंत्रणेने शनिवारी प्रत्यक्ष पाहणी केली.

प्रतिबंधित क्षेत्रात नव्या उपाययोजना
प्रतिबंधित क्षेत्रात जिल्हा प्रशासनासह पोलीस विभागाने ठोस उपाययोजना हाती घेतल्या आहेत. या ठिकाणी १२ अतिरिक्त अधिकारी आणि ६० पोलीस कर्मचारी तैनात करण्यात आले आहे. या भागाच्या संरक्षणासाठी सात विभाग तयार करण्यात आले आहे. त्यात भोसा रोड, पांढरकवडा रोड, फळभाजी, अंतर्गत रस्ते आणि जवळचा परिसर असे नियोजन करण्यात आले आहे. सात विभागावर लक्ष ठेवण्यासाठी एक पीएसआय, दिवसा आणि रात्री पाळत ठेवणार आहे. त्यासोबतच होम डीवायएसपी, पीएसआय आणि पोलीस राहणार आहे. या व्यतिरिक्त गंभीर परिस्थिती उद्भवल्यास २२ पोलिसांची अतिरिक्त तुकडी तयार ठेवली आहे. अंतर्गत भागात पाच हॉटस्पॉट घोषित करण्यात आले आहे. त्याला बॅरेकेटींग करण्यात आले आहे. हे हॉटस्पॉट एकमेकांना मिळू नये म्हणून लक्ष केंद्रीत करण्यात आले आहे. या संपूर्ण परिसरावर लक्ष ठेवण्यासाठी दोन ड्रोन कॅमेरे सज्ज असणार आहे.