महागाव : येथील प्रभाग एकमध्ये सांड पाण्याचे गटार तुंबल्याने नागरिकांचे आरोग्य धोक्यात आले आहे. नगरपंचायत प्रशासनाचा ६० महिन्यांचा कार्यकाळ संपुष्टात आल्यानंतरही तुंबलेली नाली मोकळी करण्यात प्रशासन अपयशी ठरले आहे.
या प्रभागात सिमेंट नाली बांधण्यात आली; परंतु ती काही उपयोगाची नाही. सांडपाणी जाण्यास मोठा अडथळा निर्माण झाल्याने परिसरातील सांडपाणी काढून देण्यास नगरपंचायत प्रशासन सपशेल अपयशी ठरले आहे. या संदर्भात अनेकांनी नगरपंचायतीला सूचना दिल्या. मात्र, या गंभीर विषयाकडे गांभीर्याने पाहिले गेले नाही. त्यामुळे दिवसेंदिवस या गटारातून मोठी दुर्गंधी पसरत आहे. कोरोनापेक्षाही या गटारामुळे नागरिकांच्या आरोग्याला धोका निर्माण झाला आहे. दाट वसाहत असलेल्या ठिकाणी निर्माण केलेल्या गटाराची अद्याप उपसणी झाली नाही. घनकचरा व्यवस्थापनासाठी अर्धा कोटी खर्ची घालूनही नगरपंचायत प्रशासन या कार्यात असफल ठरले आहे. त्यामुळे आगामी निवडणुकीत हा कळीचा मुद्दा ठरणार असल्याचे नागरिक सांगत आहेत.
बॉक्स
अनेक वर्षांपासून नरक यातना कायमच
मागील अनेक वर्षांपासून या परिसरातील नागरिक नरक यातना भोगत आहेत. एकदा तत्कालीन उपनगराध्यक्ष उदय नरवाडे यांच्या प्रयत्नातून ही नाली मोकळी करण्यात आली. परंतु, काही दिवसांतच परत ती तुंबली, असे नाना पतंगे यांनी सांगितले. गटाराला लागून बांधण्यात आलेली सिमेंट नाली शोभेची वस्तू ठरल्याचे बळिराम राठोड यांनी स्पष्ट केले. दरम्यान, काही ठिकाणी अतिक्रमण असून, त्यामुळे नाली मोकळी करण्यास अडचण निर्माण झाल्याने हा विषय प्रलंबित राहिल्याचे माजी उपनगराध्यक्ष उदय नरवाडे यांनी सांगितले.