सोयाबीनवर मोझॅक किडींचा प्रादुर्भाव

कपाशी पिकांवर लाल्या, तर सोयाबीन पिकांवर मोझॅक किडीचा प्रादुर्भाव झाल्याने यावर्षी उत्पन्नात घट येण्याची शक्यता शेतकऱ्यांना सतावत आहे.

बोटोणी : कपाशी पिकांवर लाल्या, तर सोयाबीन पिकांवर मोझॅक किडीचा प्रादुर्भाव झाल्याने यावर्षी उत्पन्नात घट येण्याची शक्यता शेतकऱ्यांना सतावत आहे.
जिल्ह्यात मारेगाव तालुका कापूस व सोयाबीनचे नगदी पीक घेणारा तालुका म्हणून ओळखला जातो. यावर्षी खरीपाच्या सुरूवातीच्या काळात कमी पाऊस व जास्त तापमान होते़ जून, जुलैमध्ये अत्यल्प पाऊस पडला, तरी शेतकऱ्यांनी बँकेचे कर्ज, सावकारी कर्ज घेऊन शेतात कशीबशी पेरणी केली़ मात्र नंतर पावसाच्या अनियमितपणामुळे शेतकऱ्यांना दुबार, तिबार पेरणी करावी लागली़ रासायनिक खतांचा तुटवडा, महागड्या कीटकनाशकांची फवारणी करून शेतकरी मेटाकुटीस आले असताना आॅगस्ट, सप्टेंबरमधील पावसाने शेतकऱ्यांना धीर मिळाला़
सप्टेंबरच्या पहिल्या आठवड्यातील दमदार पावसाने पर्यावरणात बदल झाला़ परिणामी कापूस व सोयाबीन पिकावर आता विविध रोगांचा प्रादुर्भाव झाला़ आहे. आता पाऊस पुन्हा बेपत्ता झाल्यागत आहे़ या महिन्याच्या प्रारंभी मुसळधार पावसाने अनेक शेतकऱ्यांच्या शेतात पाणी शिरले. त्यामुळे त्यांची कपाशी पाण्यात बुडाली़ परिणामी कपाशीची पाने गळून लाल्या रोगाचे आक्रमण झाले. त्यामुळे कपाशीचा रंग आता लालसर दिसू लागला आहे़
मारेगाव तालुक्यात यावर्षी बीटी बियाण्यांचा पेरा अधिक आहे. त्यातही अनेक शेतकऱ्याच्या कपाशीवर लाल्याने आक्रमण केल्याचे आढळले आहे. तालुक्यात ५० टक्के क्षेत्र सोयाबिनने व्यापले आहे़ यावर्षी कमीअधिक प्रमाणात सोयाबिनवरही मोझॅक व पिवळा मोझॅक आल्याचे शेतकरी सांगत आहेत. कृषी विभागाला तशी माहिती देण्यात आली. आता झाडांची वाढ खुंटलेली आहे. सोयाबिनला शेंगाही कमी प्रमाणात लागल्या आहेत़ झाडांचा रंग पिवळसर दिसून येत आहे़ त्यामुळे सोयाबीन उत्पन्नात घट येण्याची चिंता शेतकऱ्यांना सतावत आहे.
कपाशीवर मावा, तुडतुडे, फुलकीडे असल्यास १० लीटर पाण्यात १०० ग्रॅम मॅग्नेशिअम सल्फेट फवारावे, पांढरी माशी असल्यास मोनोस्टोफोस मिथेल डेमॉडाल किंवा १० लीटर पाण्यात १० मिली ३० टक्के प्रवाहीत रोगर औषध फवारावे़ सोयाबिनवर मोझॅक कीड असल्यास झाडे समूळ उपटून नष्ट करावी. तसेच डायमेथोएट ३० टक्के प्रवाही किंवा मिथील केमेटॉन २५ टक्के प्रवाही १० मिली १० लीटर पाण्यात फवारावे व शेतकऱ्यांनी कृषी कार्यालयाशी संपर्क साधावा, असे आवाहन करण्यात आले. (वार्ताहर)