गोदणीत खनिजांचे अवैध उत्खनन

शहरापासून अगदी काही किलोमीटर अंतरावर असलेल्या गोदणी गावाला स्टोन क्रशरचा विळखा आहे.

यवतमाळ : शहरापासून अगदी काही किलोमीटर अंतरावर असलेल्या गोदणी गावाला स्टोन क्रशरचा विळखा आहे. येथे गेल्या काही वर्षांपासून अवैधरित्या हजारो ब्रासचे उत्खनन झाल्याचा प्रकार बाहेर आला आहे. उत्खननासाठी शासनाची अधिकृत परवानगी आवश्यक आहे. या परवान्याचे वेळोवेळी रक्कम भरून नूतनीकरण करावे लागते. मात्र येथील काही स्टोन क्रशर चालकांनी दोन ते तीन वर्षांपासून परवान्याचे नूतनीकरणच केले नाही. ही बाब तलाठ्याने केलेल्या तपासणीत उघड झाली आहे.
शासनाच्या गौण खनिजावर अनेक स्टोन क्रशर चालक पोसले जात आहे. यंत्रणेतील काही फितुरांमुळे या स्टोन क्रशर चालकांचे चांगलेच फावत आहे. गोदणी शिवारात एका शेतकऱ्याने अनधिकृतरित्या आपल्या शेतात गिट्टी खदान लावली आहे. उत्खननाची साक्ष देणारे मोठमोठाले खड्डे या शेतकऱ्याच्या शेतात आजही कायम आहे. गोदणी परिसरातील स्टोन क्रशर चालकांनी परवाना नूतनीकरण केले की नाही याची तपाासणी करण्याचे निर्देश तहसीलदार अनुप खांडे यांनी त्या त्या साजातील तलाठी व मंडळ अधिकाऱ्यांना दिले होते. तलाठी व मंडळ अधिकाऱ्यांनी प्रत्यक्ष पाहणी केली असता धक्कादायक माहिती समोर आाली. एक हेक्टर ६२ आर मध्ये उत्खनन करणाऱ्या परवान्याची मुदत फेब्रुवारी महिन्यातच संपली. तर अन्य दोघांनी स्टोन क्रशर परवान्याचे नूतनीकरण केले नाही. नेमका या स्टोन क्रशर चालकांनी किती रुपयांचा महसूल बुडविला आहे याचा शोध महसूल यंत्रणेकडून घेण्यात येणार आहे. या तांत्रिक बाबी तपासण्यासाठी बांधकाम विभागाचे अभियंत्यांना तहसीलदार अनुप खांडे यांनी निर्देश दिले आहे. त्यानंतरच या तीनही स्टोन क्रेशर चालकांवर दोषारोप निश्चित करून कार्यवाही केली जाणार आहे.
गोदणी परिसरात अवैध उत्खनन होत असल्याच्या तक्रारी नेहमीच केल्या जातात. मात्र प्रत्यक्ष कारवाई होताना दिसत नाही. परवाना नूतनीकरण न केल्याची बाब प्रशासनाने गांभीर्याने घेतली असून त्याची सखोल चौकशीही केली जात आहे.
या तीनही स्टोन क्रशर चालकाचा विद्युत पुरवठा तातडीने तोडण्यात यावा, असे पत्र महसूल यंत्रणेकडून वीज वितरण कंपनीला देण्यात आले आहे. या अवैध उत्खननात आणखी बडे मासे अडकण्याची शक्यता वर्तविली जात आहे. शासनाच्याही जमिनीत मोठ्या प्रमाणात उत्खनन झाल्याचे बोलले जात आहे. (कार्यालय प्रतिनिधी)