शुद्ध पाण्यावरून पुसदमध्ये आरोप-प्रत्यारोप

शहराला होणारा पाणी पुरवठा शुद्ध की अशुद्ध असा वाद शहरात निर्माण झाला असून पुसद विकास मंच पाणी अशुद्ध असल्याचा दावा करीत आहे.

नगरपरिषद विरुद्ध विकास मंच : पाणीपुरवठा सभापती म्हणतात, पाणी शुद्धच !
पुसद : शहराला होणारा पाणी पुरवठा शुद्ध की अशुद्ध असा वाद शहरात निर्माण झाला असून पुसद विकास मंच पाणी अशुद्ध असल्याचा दावा करीत आहे. तर नगर परिषद पाणी पिण्यायोग असल्याचे सांगत आहे. पाणी पुरवठा सभापती राजू दुधे यांनी घेतलेल्या पत्रपरिषदेत विकास मंचने खासगी पाणी विक्रेत्यांकडून सुपारी घेतल्याचा आरोप केला आहे.
पुसद शहराला पाणी पुरवठा करणारे पूस प्रकल्प अवघे दोन टक्के पाणी शिल्लक आहे. शहरात पाणी दुर्गंधी युक्त आणि अशुद्ध येत असल्यावरून सध्या शहरातील राजकारण तापले आहे. पुसद विकास मंचने गत आठवड्यात पत्रकार परिषद घेऊन एका खासगी प्रयोगशाळेचा अहवाल सादर केला होता. त्यात पुसद शहरातील पाणी पुरवठा पिण्यायोग्य नसल्याचे सांगितले होते. या पाण्यामुळे आजाराची भीतीही व्यक्त करण्यात आली होती. या पत्रकार परिषदेनंतर पाणी पुरवठा सभापती राजू दुधे यांनी नगराध्यक्षांच्या कक्षात पत्रकार परिषद घेत, पुसद विकास मंचचा दावा खोडून काढला.
पुसदकरांना २००४ पासून पाणीटंचाईचा सामना करावा लागला होता. त्यावेळी आरोप करणाऱ्याचे वडील नगराध्यक्ष होते. तेव्हा आम्ही राजकारण केले नाही, असे सभापती राजू दुधे म्हणाले. शहराच्या प्रत्येक वार्डात माझ्या शेतातून टँकरने पाणी पुरवठा केला होता. आज महाराष्ट्रात पाणी टंचाई भीषण झाली आहे. पुसद शहरही पाण्यासाठी व्याकूल झाले आहे. अशा वेळी नगरपालिकेला किंवा संबंधित विभागाला कोणतीही तक्रार न करता खासगी प्रयोगशाळेतील अहवाल आणून नागरिकात भीतीचे वातावरण निर्माण करणे, योग्य नसल्याचे त्यांनी सांगितले.
पाण्याचे नमुने तपासणीसाठी पाठविले, मात्र ते त्यांनी कोठून घेतले हे गौडबंगाल आहे. पाण्याचे नमुने नगर परिषदेच्या अधिकाऱ्यासमक्ष घेणे आवश्यक होते. परंतु तसे न करता परस्पर नमुने पाठवून त्याचा अहवाल लोकांपर्यंत मांडणे म्हणजे दिशाभूल आहे. पुसद नगर परिषद दरमहा शहरातील विविध भागातील ४० पिण्याच्या पाण्याचे नमुने घेतात. यवतमाळच्या शासकीय प्रयोगशाळेत त्याची तपासणी होते. परंतु अद्यापही पिण्यास अयोग्य असा अहवाल प्राप्त झाला नाही. पुसद विकास मंच केवळ खासगी पाणी विक्रेत्यांना मदत व्हावी यासाठीच हा प्रकार करीत असल्याचे राजू दुधे यांनी सांगितले. पत्रकार परिषदेला नगराध्यक्ष माधवी गुल्हाने, उपाध्यक्ष डॉ. मो. नदीम, मुख्याधिकारी डॉ. अजय कुरवाळे उपस्थित होते. (तालुका प्रतिनिधी)