यवतमाळ: येथील जिल्हा कारागृहात क्षमतेपेक्षा दुप्पट कैदी आहेत. त्यामुळे नियोजन करताना कसरत होते. सध्या पाटीपुरा परिसरातील टोळी व बगीराची टोळी कारागृहात आहे. या दोन्ही टोळ्यांमध्ये सोमवारी दुपारी १२ वाजता हाणामारी झाली. यात दोन जण जखमी झाले. या प्रकरणी अवधूतवाडी पोलिसांनी नऊ जणांवर गुन्हा दाखल केला आहे.
खुनाच्या आरोपात राहुल ऊर्फ शिनू संजय शिंदे, प्रणय राजू मेश्राम, प्रसन्ना प्रमोद मेश्राम, देवानंद प्रल्हाद कलोते, रोशन पुरुषोत्तम प्रधान हे कारागृहात आहे. तर आशिष ऊर्फ बगीरा रमेश दांडेकर, सतीश सुरेश जमदाडे, मंगेश गुणवंत पांडे, पीयूष तुळशीदास देवपारे हे खुनाचा प्रयत्न केल्याच्या गुन्ह्यात कारागृहात आहेत. मागील काही दिवसांपासून या दोन्ही टोळ्यांमध्ये धुसफूस सुरू होती. सोमवारी दुपारी या दोन्ही टोळ्यातील सदस्यांनी एकमेकांंवर हल्ला चढविला. मारहाण केली.
हा प्रकार लक्षात येताच कारागृहातील शिपायांनी मध्यस्थी करून वाद सोडविला. या हाणामारीत दोन्ही गटांतील एक-एक जण जखमी झाला आहे. सतीश सुरेश जमदाडे याच्या ओठाला दुखापत झाली, तर राहुल ऊर्फ शिनू संजय शिंदे याच्या डाव्या हाताच्या बोटाला दुखापत झाली. या घटनेनंतर उपविभागीय पोलिस अधिकारी संपतराव भोसले, अवधूतवाडी ठाणेदार मनोज केदारे यांनी कारागृहातील घटनास्थळाला भेट दिली. या प्रकरणी शिपाई सचिन भुते यांच्या तक्रारीवरून दोन्ही गटांतील सदस्यांवर गुन्हे दाखल करण्यात आले आहेत.