जिल्हा परिषदेतील कोंडी फोडण्याचा प्रयत्न

जिल्हा परिषदेत २१ सप्टेंबर रोजी अध्यक्षाचा कार्यकाळ पूर्ण होत आहे. विधानसभा निवडणुकीच्या पार्श्वभूमीवर अध्यक्षाची निवड प्रक्रिया आल्याने या निवडणुकीला विशेष राजकीय महत्त्व प्राप्त झाले आहे.

अध्यक्षपदाची निवडणूक : पुसदमध्ये अध्यक्षपदासाठी आग्रह
यवतमाळ : जिल्हा परिषदेत २१ सप्टेंबर रोजी अध्यक्षाचा कार्यकाळ पूर्ण होत आहे. विधानसभा निवडणुकीच्या पार्श्वभूमीवर अध्यक्षाची निवड प्रक्रिया आल्याने या निवडणुकीला विशेष राजकीय महत्त्व प्राप्त झाले आहे. या शिवाय गेल्या अडीच वर्षापासून महागाव, पुसदमधील सदस्यांना होत असलेली कोंडी फोडण्याची संधी मिळाली आहे.
जिल्हा परिषदेत सत्ता स्थापन करताना पुसद आणि महागावमधून निवडून आलेल्या १२ सदस्यांना केवळ एकाच पदावर समाधानी राहावे लागले. या व्यतिरिक्त राष्ट्रवादीतील उर्वरित आठ सदस्यात तीन महत्त्वाची पदे ठेवण्यात आली. यातही काहींना स्थायी समितीवर संधी देण्यात आली.
आता अध्यक्षपदाची निवडणूक होवू घातल्याने पुसदमध्येच हे पद राहावे अशी भूमिका या परिसरातील १२ सदस्यांनी घेतली आहे. जिल्हा परिषदेचे अध्यक्षपद हे अनुसूचित जमाती महिला प्रवर्गासाठी राखीव आहे. सध्या विद्यमान सदस्य असलेल्या अनुसूचित जमाती महिलांमध्ये सुशिक्षित आणि समाजकारणाचा अनुभव असलेल्या चेहरा म्हणून पुसद तालुक्यातील बेलोरा सर्कलच्या डॉ.आरती फुफाटे यांच्याकडे पाहण्यात येत आहे. जिल्हा परिषदेत सत्ता स्थापन करण्यासाठी राष्ट्रवादी आणि काँग्रेस काय भूमिका घेतात हेही महत्त्वाचे ठरणार आहे. राष्ट्रवादीतील एका गटाकडून आम्ही सर्वच पर्याय वापरणार असल्याचे सांगितले जात आहे. या उलट जुन्या जानत्यांची भूमिका काँग्रेसशिवाय राष्ट्रवादीला दुसरा कुठलाही पर्याय संयुक्तीक ठरणार नाही असाही सूर ऐकायला मिळत आहे.
जिल्हा परिषदेत काँग्रेसकडे २२ सदस्य, राष्ट्रवादी काँग्रेसकडे २१ सदस्य त्यामध्ये १२ सदस्य हे पुसद आणि महागाव या दोन तालुक्यातून निवडून आलेले आहे. यामुळे अध्यक्ष निवडताना या सदस्यांचा प्रभाव कायम राहणार आहे. यापूर्वीच या बारा सदस्यांनी खासगीत एकंदरच कारभाराबाबत नाराजी व्यक्त केली आहे. आता अशी चूक होवू द्यायची नाही ही भूमिका घेऊन हे सदस्य आहे. (कार्यालय प्रतिनिधी)